Цаг уурын байгууллагаас мэдээлснээр энэ сарын 20-нд төв болон говийн аймгуудын ихэнх нутаг, мөн зүүн аймгуудын баруун хэсгээр, 21-нд зүүн аймгуудын нутгаар бороо үргэлжлэн орж, сэрүүсэх төлөвтэй байна.

Өнөөдөр буюу наймдугаар сарын 18-нд нийт нутгаар солигдмол үүлтэй, Хангай, Хөвсгөлийн уулархаг нутаг болон Онон, Улз голын хөндийгөөр дуу цахилгаантай аадар бороо орж, бусад нутгаар бороо орохгүй. Салхи баруунаас секундэд 5-10 метр, борооны өмнө түр зуур ширүүсэх бөгөөд Дархадын хотгор, Монгол-Алтай, Хангай, Хөвсгөл, Хэнтийн уулархаг нутаг болон голын хөндүүдээр 20-25 хэм, говийн өмнөд хэсгээр 30-35 хэм, бусад нутгаар 24-29 хэм дулаан байна. Улаанбаатар хот орчимд үүлэрхэг ч бороо орохгүй, 24-26 хэм дулаан байх бол Багануурт 23-25 хэм, Тэрэлжид 23-25 хэмийн дулаантай байна.

Урьдчилсан төлөвөөр 19-нд баруун болон төвийн аймгуудын зарим хэсгээр, 20-нд төв, говь, зүүн аймгуудын ихэнх нутагт, 21-нд төвийн хойд болон говийн зүүн хэсэг, зүүн аймгуудын ихэнх нутагт, 22-нд Алтай, Хөвсгөл, Хэнтийн уулархаг бүсээр бороо орж, дуу цахилгаантай аадар болох магадлал өндөр байна. Энэ хугацаанд ихэнх нутгаар сэрүүсэж, уулархаг болон хүйтэн хөндийн нутгаар шөнөдөө 0-5 хэм, өдөртөө 14-19 хэм, говийн өмнөд бүсэд шөнөдөө 15-20 хэм, өдөртөө 25-30 хэм, бусад нутгаар шөнөдөө 9-14 хэм, өдөртөө 18-23 хэмийн дулаан байхыг анхаарууллаа.

Эх сурвалж: Цаг Уур Орчны Шинжилгээний Газар