АНУ-ын Холбооны мөрдөх товчоо Мексикийн талд Испанийн байлдан дагуулагч Эрнан Кортесын гарын үсэгтэй, ойролцоогоор 500 жилийн настай гар бичмэлийн хуудсыг буцаан өглөө. 1527 оны хоёрдугаар сарын 20-нд Кортес гарын үсэг зурсан энэ баримт нь Мексикийн үндэсний архиваас хэдэн арван жилийн өмнө хулгайлагдсан байжээ.
Мексикийн архивчид 1993 онд цуглуулгаа бичил хальсанд буулгах үеэр 15 хуудас алга болсныг илрүүлсэн бөгөөд эдгээрийг 1985-1993 онд хулгайлсан гэж үздэг. Мексикийн Засгийн газар өнгөрсөн онд ХМТ-ноос тусламж хүссэний дараа мөрдөн шалгах ажиллагаа эхэлж, Нью-Йорк хотын цагдаагийн газар болон АНУ-ын Хууль зүйн яам оролцжээ.
ХМТ-ны Урлагийн гэмт хэрэгтэй тэмцэх багийн мэдээлснээр, хуудсыг олон хүний гар дамжсан тул хэн нэгэнд хариуцлага тооцохгүй юм. Энэ бол Кортестой холбоотой Мексикт буцаасан хоёр дахь түүхэн баримт бөгөөд 2023 онд түүний 16 дугаар зууны үед бичсэн захидлыг мөн буцааж өгч байсан байна.
Эх сурвалж: CNN
