АНУ-ын Ерөнхийлөгч Дональд Трамп ОХУ-ын Ерөнхийлөгч Владимир Путинтэй хийх уулзалт амжилтгүй болох магадлал 25 хувьтай гэж үзэж байгаагаа илэрхийллээ. Тэрбээр өчигдөр Fox News Radio-гийн нэвтрүүлэгт оролцох үеэрээ хөтлөгч Брайан Килмидтэй ярилцаж, ийнхүү байр сууриа илэрхийлжээ.
“Путин хэлэлцээр байгуулна гэж найдаж байна, гэхдээ уулзалт амжилтгүй болох магадлал 25 хувьтай” хэмээн Ерөнхийлөгч Трамп хэлсэн байна.
Түүний хэлснээр, уг уулзалт нь цаашдын хэлэлцээрүүдийн суурь болох чухал алхам бөгөөд хоёр дахь уулзалтыг хийх нөхцөлийг бүрдүүлнэ гэж үзэж байна. Тэрбээр “хил, нутаг дэвсгэр болон бусад асуудлаар буулт хийх боломжийг хэлэлцэнэ” хэмээгээд, Владимир Путин болон Украины Ерөнхийлөгч Володимир Зеленский нартай уулзах гурван боломжит байршлыг судалж буйгаа ч дурджээ.
“Уулзалт хэрхэн өрнөхөөс хамаарч, би Зеленскийтэй утсаар ярьж уулзалт хийх газарт урьж магадгүй. Хэлэлцээр хийх эсэх нь Путин, Зеленский хоёрын шийдвэрээс хамаарна. Би хэлэлцээг удирдахгүй, зөвхөн боломжийг олгоно” гэж Трамп онцолсон байна.
Трамп, Путин нар Оросын арми Украинд халдан довтолсноос хойш анх удаа уулзахаар төлөвлөж байгаа бөгөөд уулзалт АНУ-ын Аляска мужийн Анкориж хотын Элмендорф-Ричардсон цэргийн баазад болох аж. ОХУ-ын Ерөнхийлөгчийн туслах Юрий Ушаковын мэдээлснээр, хоёр улсын төрийн тэргүүн нарын ганцаарчилсан уулзалт орон нутгийн цагаар 11:30-д (Москвагийн цагаар 21:30) орчуулагч нарын оролцоотой явагдана. Удалгүй хоёр талын төлөөлөгчдийн өргөтгөсөн уулзалт болж, өглөөний цай хамтдаа зооглохоор төлөвлөгджээ.
Оросын төлөөлөгчдийн бүрэлдэхүүнд:
-
Гадаад харилцааны сайд Сергей Лавров
-
Батлан хамгаалахын сайд Андрей Белоусов
-
Сангийн сайд Антон Силуанов
-
Ерөнхийлөгчийн тусгай төлөөлөгч Кирилл Дмитриев (гадаад орнуудтай эдийн засгийн хамтын ажиллагаа хариуцсан) нар багтаж байна.
Уулзалтын дараа хоёр ерөнхийлөгч хамтарсан хэвлэлийн хурал хийхээр төлөвлөжээ.
Тус дээд хэмжээний уулзалтын гол сэдэв нь “Украинд үүссэн нөхцөл байдлыг зохицуулах” асуудал байх бөгөөд үүний хүрээнд энэ сарын 6-нд Москвад болсон АНУ-ын Ерөнхийлөгчийн тусгай элч Стивен Уиткоффын уулзалтын үр дүнг харгалзан үзэх аж.
Мөн уулзалтын үеэр энх тайван, аюулгүй байдал, хоёр талын хамтын ажиллагаа, ялангуяа худалдаа, эдийн засгийн салбар дахь хамтран ажиллах боломжуудыг хэлэлцэхээр төлөвлөсөн талаар Ушаков мэдээлсэн байна.
Эх сурвалж: Fox News Radio, Кремлийн хэвлэл мэдээллийн алба
