Хүн дүрст роботуудын дэлхийн анхны спортын наадам БНХАУ-ын нийслэл Бээжин хотноо пүрэв гарагт эхэлж, ухаалаг шийдвэр гаргах болон хамтран ажиллах чадвар зэрэгт гарсан шинэ ололт амжилтыг олон нийтэд танилцуулж байна.

Тус наадамд АНУ, Герман, Итали зэрэг 16 орны 280 баг оролцож, баасан гарагаас ням гараг хүртэл Үндэсний тэшүүрийн зууван талбайд өрсөлдөнө. Тэмцээний хөтөлбөрт гүйлт, уртын харайлт, чөлөөт дасгал, хөл бөмбөг зэрэг спортын нийт 26 төрөл багтжээ.

Үүнээс гадна оролцогч роботуудад дараах ур чадварын даалгаврууд өгөгдөнө:

• Бараа материал зөөх

• Эм ангилах

• Цэвэрлэгээ хийх

• Янз бүрийн нөхцөлд асуудал шийдэх

Бээжин хотын Эдийн засаг, мэдээллийн технологийн товчооны дарга Ли Ечуан “Энэхүү арга хэмжээ нь хүн дүрст роботуудын хамгийн сүүлийн үеийн ололт амжилтыг шалгах, бодит хэрэглээнд нэвтрүүлэхэд спортын өрсөлдөөний арга хэлбэрийг ашиглаж буйгаараа онцлог” хэмээн онцолжээ.

Бээжингийн засаг захиргааны зөвлөх Ли Жики “Бид хүн дүрст роботуудыг лабораториос үйлдвэр, эмнэлэг, гэр ахуй зэрэг бодит орчинд илүү өргөнөөр ашиглах боломжийг хангахыг зорьж байна. Энэ бол роботуудыг үйлдвэрлэлийн шатанд оруулах чухал алхам” гэж мэдэгдэв.

Тус спортын наадам нь 2025 оны наймдугаар сарын 8-нд эхэлсэн “Роботуудыг илүү ухаалаг болгох нь” сэдэвт Дэлхийн роботын бага хурлын дараа зохион байгуулагдаж байна.