Сүүлийн жилүүдэд уур амьсгалын өөрчлөлт аяллын төлөвлөлтөд хүчтэй нөлөөлөх боллоо. Жишээ нь, Непалд дөрөв, тавдугаар сар хамгийн тохиромжтой үе гэж олон эх сурвалж зөвлөдөг ч энэ жил агаарт утаа, бохирдол ихэсч, эрт эхэлсэн борооны улирал төлөвлөгөөг эвдсэн байна. Ийм тогтворгүй байдал зөвхөн Непалд бус дэлхийн олон оронд ажиглагдаж байгаа бөгөөд Австралид энэ гуравдугаар сард түүхэндээ хамгийн өндөр дулааныг бүртгэж, Японд сакура цэцэг улам эрт дэлгэрчээ.

Судлаачид, аяллын операторууд, орон нутгийн туршлагатай хөтөч нарын үзэж буйгаар, цаг агаарын өөрчлөлт богино хугацааны таамгийг ч найдвартай гаргах боломжийг багасгаж байна. Үүний улмаас уламжлалт “best time to visit” зөвлөмжүүд улирлын бодит нөхцөлтэй зөрчилдөх болжээ. Зарим томоохон операторууд цаг агаарын эрсдэлийг мэдээлэхээс зайлсхийж, захиалга алдахгүй байхыг илүүд үздэг нь жуулчдыг бэлтгэлгүй ирэхэд хүргэж байна.

Шийдэл нь илүү ил тод, бодит мэдээлэл өгөх, аялагчдыг уян хатан төлөвлөхөд дэмжихэд оршино. Орон нутгийн шинэчилсэн мэдээлэл, агаарын чанар хэмжигч, бодит цагийн цаг агаарын аппликейшн ашиглах, уян хатан захиалга, даатгал, нөөц төлөвлөгөө боловсруулах зэрэг нь зайлшгүй алхам болжээ. Мөн улирлын бус аялал, сэрүүн бүс нутгийн эрэлтийг нэмэгдүүлж, Европт зуны аяллууд хавар, намар руу шилжиж байна.

Уур амьсгалын өөрчлөлтөд дасан зохицсон аялал жуулчлалын шинэ хэв маяг нь зөвхөн улирлын түүхэн мэдээлэлд найдах бус, бодит нөхцөлд суурилсан төлөвлөгөө боловсруулахыг шаардсаар байна.

Эх сурвалж: BBC Travel