ВВС-ийн мэдээлснээр Украины дайны улмаас Оросын хөдөлмөрийн хүч дутагдаж, Москва Хойд Солонгосоос ажилчид олноор авч эхэлжээ. Өмнөд Солонгосын тагнуулын байгууллагын мэдээллээр өнгөрсөн онд 10 мянга гаруй, энэ онд 50 мянга хүртэл ажилчин ирүүлэхээр төлөвлөсөн байна. Эдгээр хүмүүс голчлон өндөр барилга барих зэрэг хүнд нөхцөлтэй ажилд 18 гаруй цаг тасралтгүй хөдөлмөрлөж, жилийн турш хоёрхон өдөр амардаг аж.

Барилгын талбайд хоноглож, хойд солонгосын аюулгүй байдлын албаныхны хатуу хяналт дор ажилладаг тэд бохир, шавьжтай контейнерт эсвэл дуусаагүй барилгын шал дээр унтдаг. Цалин маш бага — сарын 100-200 ам.доллар бөгөөд ихэнх нь “үнэнчийн татвар” нэрээр төрдөө шууд шилждэг. Мөнгө нь зөвхөн нутагтаа буцаж ирэхэд олгогддог тул оргохоос сэргийлэх хэрэгсэл болдог.

Ажилчдын зарим нь бэртэл гэмтэл авч ч эмнэлэгт очих боломжгүй, аюулгүй ажиллагааны шаардлага хангахгүй нөхцөлд ажиллаж байгаагаа онцолжээ. Олон улсын хоригийн улмаас 2019 онд ийм хөдөлмөрийг зогсоох ёстой байсан ч Орос оюутны виз зэрэг аргаар хоригийг тойрон ажилчид авч байгаа аж.

Сүүлийн үед орголт буурч, эрх чөлөөг улам хязгаарласан байна. Гадна гарах боломж бараг байхгүй болж, сард нэг удаа гардаг байсан явдал тасарч, үзэл суртал, өөрийгөө шүүмжлэх сургалт нэмэгдсэн гэж судлаачид хэлжээ. Шинжээчдийн үзэж буйгаар, энэ хөдөлмөрийн хүч нь Ким Жөн Ун болон Владимир Путины дайны үеийн хамтын ажиллагааны урт хугацааны “өв” болон үлдэх магадлалтай.

Эх сурвалж: BBC