Австрали улс ирэх есдүгээр сард болох НҮБ-ын Ерөнхий Ассамблейн чуулганы үеэр Палестин улсыг албан ёсоор хүлээн зөвшөөрнө гэж Ерөнхий сайд Энтони Албанезе мэдэгдлээ. Их Британи, Франц, Канад зэрэг улс орнууд өмнө нь ижил байр суурь илэрхийлсэн юм.

Энтони Албанезегийн хэлснээр, цэрэггүй болгох, бүх нийтийн сонгууль явуулах, Израилийн оршин тогтнох эрхийг хүлээн зөвшөөрөх зэрэг амлалтуудыг Австралийн тал Палестины эрх баригчдаас авчээ. Тэрбээр хоёр улсын шийдэл нь Ойрх Дорнод дахь хүчирхийллийн мөчлөгийг эвдэж, Газын мөргөлдөөн, өлсгөлөнг зогсоох итгэл найдвар гэдгийг онцолсон байна.

Гэхдээ Израилийн тал Палестиныг хүлээн зөвшөөрөх нь “терроризмыг шагнасан үйлдэл” болохыг мэдэгдсэн юм. Газын зурвас дахь дайны улмаас өнгөрсөн бямба гарагаас хойш таван хүн амиа алдаж, нийт 217 хүн нас барсан тухай ХАМАС-ын хяналтад байдаг Эрүүл мэндийн яам мэдээлжээ. Мөн 2023 оноос хойш Израилийн цэргийн ажиллагаанд 61 мянга гаруй хүн амь үрэгджээ.

ХАМАС бүлэглэлийн 2023 оны 10 дугаар сарын 7-ны халдлагын хариуд Израил довтолгоо эхлүүлсэн бөгөөд энэ халдлагын үеэр 1200 орчим хүн амь үрэгдэж, 251 хүн барьцаалагдсан юм.

Палестины эрх баригчид улс орныг нь хүлээн зөвшөөрч байгаа нь тусгаар тогтнолыг дэмжиж буй хэрэг гэж үзэж байна. Австралийн Засгийн газар Палестины засаг захиргааны тэргүүн Махмуд Аббасаас “ХАМАС шинэ улсад ямар ч үүрэг гүйцэтгэхгүй” гэсэн баталгаа авсны дараа ийм шийдвэр гаргасан гэнэ.

Өнгөрсөн онд Испани, Ирланд, Норвег зэрэг улс Палестиныг албан ёсоор хүлээн зөвшөөрч, энэ нь ХАМАС болон Израилын хооронд гал зогсоход тус болохыг онцолсон юм.

Одоогоор НҮБ-ын 193 гишүүн улсын 147 нь Палестиныг хүлээн зөвшөөрч, Палестин нь НҮБ-д байнгын ажиглагч улсын статустай бөгөөд санал өгөх эрхгүйгээр үйл ажиллагаанд оролцдог байна.

Эх сурвалж: BBC