Нэг ангийн хүүхдүүд учир битүүлгээр алга болдог үйл явдлыг өгүүлсэн “Weapons” аймшгийн кино Хойд Америкт нээлтээ хийсэн эхний долоо хоногтоо 42.5 сая ам.долларын орлого олж, бокс-оффисын жагсаалтыг тэргүүлжээ.

“Энэ бол аймшгийн киноны хувьд онцгой амжилттай нээлт” хэмээн “Franchise Entertainment Research” фирмийн шинжээч Дэвид А. Гросс жүжигчин Жулиа Гарнер, Жош Бролин нарын тоглосон уг бүтээлийн талаар онцолсон байна.

Жагсаалтын хоёрдугаарт “Disney”-ийн бүтээл “Freakier Friday” 29 сая ам.долларын орлогоор бичигдэв. 2003 онд үзэгчдэд хүрсэн “Freaky Friday” киноны үргэлжлэлд Линдсей Лохан, Жэйми Ли Кертис нар өөрсдийн дүрд дахин тоглосон бөгөөд энэ удаагийн нээлтийн орлого нь эхний ангийнхаас давсан гэж Д. Гросс тэмдэглэжээ.

Гуравдугаарт “Disney”-ийн “The Fantastic Four: First Steps” 15.5 сая ам.долларын орлогоор жагсаж, АНУ болон Канадын зах зээлээс нийт 230.4 сая ам.долларын орлого цуглуулаад байна. Үүний дараагаар “Universal”-ын “The Bad Guys 2” хүүхэлдэйн кино 10.4 сая ам.доллараар дөрөвдүгээрт, “Paramount”-ын “Naked Gun” инээдмийн кино 8.4 сая ам.доллараар тавдугаарт бичигджээ.

Топ 10-т мөн “Superman” (7.8 сая ам.доллар), “Jurassic World: Rebirth” (4.7 сая ам.доллар), “F1: The Movie” (2.8 сая ам.доллар), “Together” (2.6 сая ам.доллар), “Sketch” (2.5 сая ам.доллар) зэрэг кино багтсан байна.

Эх сурвалж: AFP