Туркийн баруун хойд нутгийн Балыкесир мужид ням гаргийн орой болсон 6.1 магнитудын газар хөдлөлтийн улмаас нэг хүн амиа алдаж, 29 хүн гэмтэж бэртлээ. Дотоод хэргийн сайд Али Йерликаягийн мэдээлснээр, голомт болсон Сындыргы хотод нурангид дарагдсан 81 настай эмэгтэй нас баржээ. Мөн 16 барилга нурсан байна.
Байгалийн гамшгийн уршгийг арилгах агентлагийн мэдээлснээр, газар хөдлөлт орон нутгийн цагаар 19:53-д болж, Истанбулд хүртэл мэдрэгдсэн байна. Ерөнхийлөгч Режеп Тайип Эрдоган нэрвэгдсэн иргэдэд хурдан эдгэрэхийг хүсэж, сэргээн босголтын ажлыг нягт хянаж байгаагаа илэрхийлжээ.
Эрэн хайх, аврах ажиллагаа дууссан бөгөөд хүний амь нас эрсэдсэн өөр тохиолдол бүртгэгдээгүй байна. Сындыргыгийн зурагт өндөр барилгууд бүрэн нурж, төмөр, нуранги овоорсон байдал харагдаж байгаа юм.
Турк улс гурван тектоник хавтангийн уулзварт байрладаг тул газар хөдлөлт ихтэй бүс нутагт тооцогддог. 2023 оны хоёрдугаар сард тус улсын зүүн өмнөд хэсэгт болсон 7.8 магнитудын хүчтэй газар хөдлөлтөд 50 мянга гаруй хүн, хөрш Сирид 5000 хүн амь үрэгдэж байв.
Эх сурвалж: BBC News
