АНУ-ын саналын дагуу Владимир Путин, Дональд Трамп нар уулзахаар зарчмын тохиролцоонд хүрч, уулзалтын байршлыг тодорхойлсон ч албан мэдээллийг дараа өгөхөөр болсон талаар Оросын ерөнхийлөгчийн туслах Юрий Ушаков мэдэгдлээ. Наймдугаар сарын зургаанд Москвад болсон уулзалтын үеэр Путин АНУ-ын ерөнхийлөгчийн тусгай элч Стивен Уиткоффыг хүлээн авч, гурван цаг гаруй ярилцжээ. Хэлэлцээрийн гол сэдэв нь Украины хямрал болон хоёр улсын стратегийн хамтын ажиллагааны төлөв байв.

Дональд Трамп хэлэлцээг үр дүнтэй хэмээн нэрлэж, “Том дэвшил гарлаа. Европын түншүүдтэйгээ ярилцахад бүгд энэ дайн дуусах ёстой гэдэгтэй санал нэгдсэн” хэмээн мэдэгдсэн байна. Америкийн тал Уиткоффын уулзалтын талаар мэдээлэл авсны дараа Трамп Украины ерөнхийлөгч Владимир Зеленскийтэй утсаар холбогджээ.

The New York Times сонины мэдээлснээр, Трамп, Путин нар ирэх долоо хоногт уулзаж, дараа нь Трамп Зеленскийтэй уулзахаар төлөвлөсөн байна. Энэ талаар тэр Их Британийн ерөнхий сайд Кир Стармер, Финляндын ерөнхийлөгч Александр Стубб, Германы канцлер Фридрих Мерц, НАТО-гийн ерөнхий нарийн бичгийн дарга Марк Рютте болон АНУ-ын удирдлагуудтай утсаар ярилцжээ. Зарим эх сурвалжийн хэлснээр, европын удирдагчид төлөвлөгөөнд төдийлөн таатай хандаагүй бол, бусад нь дэмжсэн гэжээ.

Путин, Уиткофф нарын уулзалтын дараа Трамп сэтгүүлчдэд “Путин, Зеленский нарын саммит хийх боломж бий” гэсэн өөдрөг байр суурь илэрхийлснийг Forbes уламжилсан байна. Мэдээний дараа Оросын хөрөнгийн зах зээл огцом өсч, Мосбиржийн индекс бараг таван хувиар нэмэгдэж, сүүлийн хоёр сарын дээд түвшинд хүрчээ.

Эх сурвалж: OfficeLife, Forbes, The New York Times