Оросоос нефть худалдан авч байгаатай нь холбогдуулан Энэтхэгийн бараа бүтээгдэхүүнд 25 хувийн нэмэлт татвар ногдуулах тухай зарлигийг АНУ-ын Ерөнхийлөгч Дональд Трамп лхагва гарагт гаргалаа. Энэхүү шинэ шийдвэр хэрэгжсэнээр Энэтхэгээс АНУ-д импортлогдож буй зарим бараанд ногдуулах нийт татварын хэмжээ 50 хувьд хүрч, АНУ-ын түүхэнд ногдуулсан хамгийн өндөр импортын тарифуудын нэг болж байгаа юм.
Шинэ тарифыг 2025 оны наймдугаар сарын 27-ны өдрөөс эхлэн мөрдөх бөгөөд Энэтхэгийн бараа бүтээгдэхүүн экспортод ноцтой нөлөө үзүүлж болзошгүй хэмээн шинжээчид анхааруулж байна.
Энэтхэгийн Гадаад хэргийн яам мэдэгдэлдээ:
-
АНУ-ын шийдвэрийг “шударга бус, үндэслэлгүй” хэмээн буруушааж,
-
Оросоос бараа импортлох тухай өөрсдийн байр суурийг нэгэнт тодорхой илэрхийлсэн болохыг онцлон,
-
Үндэсний эрх ашгаа хамгаалахын тулд шаардлагатай бүхий л арга хэмжээг авахаа мэдэгдсэн байна.
АНУ-ын Ерөнхийлөгч Дональд Трамп өмнө нь хийсэн мэдэгдэлдээ, “Оросын дайны машинд шатахуун нийлүүлсээр байгааг нь үл тоож, Энэтхэгийн талд анхааруулга өгөх шаардлагатай” хэмээн байр сууриа илэрхийлж байжээ.
Уг татварын нэмэгдэл нь Энэтхэг-АНУ-ын худалдаа, геополитикийн харилцаанд тодорхой дарамт үүсгэж болзошгүй байна.
Эх сурвалж: BBC
