БНХАУ-д лхагва гарагт мөрдөгдөж эхэлсэн шинэ журмын дагуу төрийн албан хаагчдын хурал, илтгэл, бичиг цаасны ажлыг эрс багасгах, цахим хэлбэрт шилжүүлэх чиглэл баримтлан ажиллахаар болжээ. Тус журмыг Хятадын Коммунист намын Төв хороо болон Төрийн Зөвлөлийн ерөнхий газраас хамтран баталсан бөгөөд төрийн албаны доод шатны албан хаагчдыг утга учиргүй хүнд суртлаас ангижруулах, ажлын ачааллыг бууруулах зорилготой юм.

Журмын хүрээнд дараах гол заалтуудыг хэрэгжүүлэхээр тусгасан байна:

• Албан бичгийн тоог нэмэгдүүлэхгүй, харин бууруулна. Хэлтсүүд өмнөх оноос олон баримт бичиг гаргавал үндэслэлээ бичгээр тайлбарлах үүрэгтэй.

• Баримт бичиг хэт урт байж болохгүй. Ерөнхийдөө 5000 тэмдэгтээс, тусгай даалгавартай холбоотой бичиг 4000 тэмдэгтээс хэтрэхгүй байх журамтай.

• Хурлын тоо, хэлбэрийг хязгаарлана. Жил бүрийн салбар хуралдаануудыг багасгах, хэлтсийн хурлыг нэгтгэх, танилцуулгын хэлбэрийг богиносгохыг үүрэг болгожээ.

• Илтгэл нэг цагт багтах ёстой. Хэлэлцүүлэгт тулгуурласан хурал нэг өдөр хагасын дотор, бусад уулзалт хагас өдөрт багтаж дуусах шаардлагатай.

• Биечлэн бус уулзалтыг дэмжинэ. Телеконференц болон дүрс бичлэгт суурилсан уулзалтыг илүүд үзэх ёстой гэж заасан байна.

• Цахим төрийн үйлчилгээний хэрэглээг нэмэгдүүлнэ. Аппликейшн хөгжүүлэлт, ашиглалтыг журмаар дэмжихээр тусгажээ.

• Гомдлын тоонд бус чанарт анхаарна. Доод шатны өргөдөл, санал хүсэлтийн ажлыг зөвхөн тоогоор бус, агуулгаар нь үнэлэх хэрэгтэй гэж дурдсан байна.

Уг журам нь Хятадын төрийн үйлчилгээ, албан харилцааг үр ашигтай, иргэдэд ойр, хүнд сурталгүй болгоход чиглэж байгаа бөгөөд бодлогын түвшинд товч, оновчтой, хэрэгжихүйц баримт бичиг боловсруулах шаардлагыг тавьж буйгаараа онцлогтой гэж ажиглагчид дүгнэж байна.

Эх сурвалж: Xinhua