Аялал, зугаалгын улирал үргэлжилж буй энэ үед гол, усны ослоос урьдчилан сэргийлэх зорилгоор Онцгой байдлын ерөнхий газар /ОБЕГ/-аас завьт болон хөдөлгөөнт эргүүлүүдийг улсын хэмжээнд ажиллуулж байна.

Энэхүү арга хэмжээний хүрээнд нийслэлийн долоон дүүрэг болон 13 аймгийн 43 байршилд алба хаагчид үүрэг гүйцэтгэж байгаа бөгөөд гол, мөрний эрэг дагуух амралт, аялалын бүсэд амарч буй иргэдэд урьдчилан сэргийлэх анхааруулга, мэдээллийг шуурхай хүргэх ажлыг зохион байгуулж байна.

Завьт эргүүлүүд нь иргэдийн аюулгүй байдлыг хангаж, усны ослын эрсдэлээс сэргийлэх зорилготойгоор ажиллаж байгаа бөгөөд энэхүү үйл ажиллагаа 2025 оны есдүгээр сарын 15-ныг хүртэл үргэлжилнэ. Иргэдийг гол, нуурын усанд анхаарал болгоомжтой байх, хүүхдүүдийг хараа хяналтгүй орхихгүй байхыг албаныхан анхааруулж байна.

Эх сурвалж: Онцгой байдлын ерөнхий газар