АНУ-ын Ерөнхийлөгч Доналд Трамп ОХУ-ын Ерөнхийлөгч Владимир Путинтэй “тун удахгүй” уулзах магадлалтай байгааг лхагва гарагт мэдэгдлээ. Тэрбээр сэтгүүлчдэд өгсөн тайлбартаа, хоёр орны хоорондын асуудлаар “ихээхэн ахиц дэвшил” гарсныг онцолж, ОХУ-ын төрийн тэргүүн болон АНУ-ын Ойрх Дорнодын асуудал хариуцсан тусгай төлөөлөгч Стив Уиткофф нарын хийсэн яриа хэлэлцээг “маш сайн хэлэлцээ болсон” хэмээн үнэлсэн байна.

Д.Трамп “Удахгүй уулзалт болох магадлал өндөр байна” гэж хэлсэн бол АНУ-ын Төрийн нарийн бичгийн дарга Марко Рубио “олон саад тотгорыг даван туулах томоохон ажил” хүлээж байгааг дурджээ. Тэрээр “Өнөөдөр сайхан өдөр байсан ч биднийг маш их ажил хүлээж байна. Ирэх өдрүүдэд, магадгүй ойрын хэдэн долоо хоногт эдгээр асуудлыг шийдвэрлэх болно гэдэгт найдаж байна” хэмээн Fox Business сувгаар мэдэгдэв.

Түүнчлэн Цагаан ордны эх сурвалжийг эш татан мэдээлснээр, Доналд Трамп нь Украины Ерөнхийлөгч Владимир Зеленскийтэй ч уулзахад нээлттэй байгаагаа илэрхийлсэн аж. АНУ-ын зүгээс Украины асуудлаар ОХУ-д өгсөн хугацаа дуусахын өмнөхөн В.Путин, С.Уиткофф нарын уулзалт болсон нь уг хэлэлцээрийн боломжит үр дүнг ойртуулж буй дохио гэж зарим шинжээчид үзэж байна.

Эх сурвалж: AP