Билл ба Мелинда Гэйтсийн сангаас 2030 он хүртэл эмэгтэйчүүдийн эрүүл мэндийн судалгаа, шинэ шийдэлд зориулан хоёр тэрбум таван зуун сая ам.долларын хөрөнгө оруулалт хийхээ мэдэгдлээ. Энэ нь Билл Гэйтс бүх хөрөнгөө 2045 он гэхэд буяны ажилд зориулахаа амласнаас хойших хамгийн том, өргөн хүрээтэй хөрөнгө оруулалт болж байна.

Тэрээр эмэгтэйчүүдийн эрүүл мэнд олон арван жилийн турш судалгаа, анхаарлын гадна орхигдож ирснийг онцолж, “хэт олон эмэгтэй хүнд өвчинд нэрвэгдэж, нас барж байна” хэмээн мэдэгдсэн юм. Тиймээс сангийн зүгээс таван үндсэн чиглэлд анхаарлаа хандуулж байна. Үүнд:

• эх барих болон эхчүүдийн дархлааны асуудал,

• жирэмсэн үед тавих эрүүл мэнд, хоол тэжээл,

• сарын тэмдгийн үед тохиолддог өвчин эмгэг,

• эмэгтэйчүүдийн өвөрмөц эмгэг,

• жирэмслэлтээс хамгаалах шинэ аргачлалууд оржээ.

Судалгааны ажил эмэгтэйчүүдийг хангалттай хамарч чаддаггүй тул энэ салбарын хөгжил удааширч байна гэж Гэйтсийн сангийн жендерийн чиглэл хариуцсан доктор Анита Заиди тайлбарлалаа. Тэрээр “эмэгтэйчүүдийн эрүүл мэндэд чиглэсэн анагаахын судалгаа дэлхий дахины нийт судалгааны зардлын дөнгөж нэгхэн хувийг эзэлж байгаа” хэмээн онцолсон байна.

Эх сурвалж: Reuters, officelife.media