Францын баруун өмнөд хэсэгт орших Корбьер нуруунд гарсан ойн түймэр хурдацтай тархаж, томоохон авто замыг хаалгаж, есөн хүнийг гэмтээжээ. Тэдгээрийн дотор долоон гал сөнөөгч, хоёр энгийн иргэн байгаа бөгөөд нэг хүний биеийн байдал хүнд, хүнд түлэгдсэн байдалтай байна гэж Од бүсийн удирдлагууд мэдээлжээ.

Түймэр анх Рибауте тосгоноос эхэлж, одоогоор 11 мянган га талбайг хамарсан томоохон хэмжээтэй болсон байна. Нэмж хэлэхэд, анхны түймрийн голомтоос баруун хойд зүгт 20 км зайд дахин нэг түймэр дэгдэж, бүс нутгийн нөхцөл байдлыг улам хүндрүүлжээ.

Энэ нөхцөл байдлын улмаас:

• Нэг тосгоныг хэсэгчлэн нүүлгэн шилжүүлж

• A9 хурдны замын зарим хэсэг, тэр дундаа Франц, Испанийн хил орчмын хэсгийг хааж

• Перпиньон болон Нарбонн хотуудын хоорондох замын хэсэгт хөдөлгөөнийг түр зогсоожээ

Францын Ерөнхийлөгч Эммануэль Макрон мягмар гаргийн орой X хуудсаараа дамжуулан мэдэгдэхдээ, түймрийн тархалт эрчимжиж буйг дурдсаны зэрэгцээ үндэсний хэмжээний бүх боломжит нөөцийг дайчилж байгаагаа мэдэгдэв.

1200 гаруй гал сөнөөгч, гал унтраах усан онгоцууд ашиглан түймэртэй тэмцэж байгаа ч цаг агаарын тааламжгүй нөхцөл (их халуун, хуурайшилт, салхи) тархалтыг улам түргэсгэж байгааг Од бүсийн Ерөнхий нарийн бичгийн дарга Люси Роеш онцолжээ.

Францын Гал түймэртэй тэмцэх албаны нийтэлсэн дүрс бичлэгт, тосгоны ар талын уулархаг бүсээс хар утаа саглан гарч, тэнгэрийг бүрхсэн аймшигт дүр зураг харагдаж байна.

Эх сурвалж: AFP