Засгийн газрын 2025 оны наймдугаар сарын 6-ны ээлжит хуралдаанаар Богд хааны ордон болон түүх, соёлын өвийг хамгаалах асуудлыг хэлэлцэж, холбогдох байгууллагуудад тодорхой үүрэг даалгавар өглөө.

Монгол төр, шашныг хослон барьсан Богд хаан Жавзандамба хутагтын зуны ордон нь 1911 оны Үндэсний эрх чөлөөний хувьсгалын удирдагчийн түүхэн өв, Улаанбаатар хотын хот байгуулалтын эхлэл, язгуур соёлын дурсгал хэмээн үнэлэгдэж буй. Гэтэл 2007 онд нийслэлийн Засаг даргын захирамжаар Хан-Уул дүүргийн 11-р хорооны нутаг дахь Богд хааны ордны залгаа 700 м.кв газрыг иргэнд өмчлүүлсэн нь түүх, соёлын өвийг хамгаалах төрийн үүргээ биелүүлээгүй үйлдэл гэж Ерөнхий сайд Г.Занданшатар шүүмжиллээ.

Иймд түүх, соёлын дурсгалт газрын унаган төрх, соёлын үнэт шинжийг алдагдуулахгүйгээр хадгалах, хойч үед өвлүүлэх шаардлагыг харгалзан дараах үүргийг өгсөн байна:

• 2007 оны 523 дугаар захирамжийн хууль ёсны байдлыг шалгаж, зөрчил илэрвэл хариуцлага тооцох, хохирлыг нэхэмжилж үр дүнг энэ сард багтаан Засгийн газарт танилцуулах

• Барилгын зөвшөөрлийг түр түдгэлзүүлж, Захиргааны ерөнхий хуулийн дагуу хууль хяналтын байгууллагаар хянуулах

• Богд хааны зуны ордныг улсын хамгаалалтын зэрэглэлд оруулах асуудлыг Засгийн газраар шийдвэрлүүлэх

• Богд хааны Хүрэн ордны архитектурын дурсгалт байдлыг хадгалахын тулд эргэн тойрон дахь барилга байгууламжид өндрийн хязгаар тогтоох

• Сэргээн засварлах, хамгаалах төлөвлөгөө боловсруулж, хамгаалалтын бүсийг бүрэн тогтоосон эсэхийг шалгаж, шаардлагатай бол гүйцээж тогтоох

Эдгээр арга хэмжээг хэрэгжүүлснээр Монгол төрийн түүхийн чухал өв болох Богд хааны ордныг бүрэн эхээр нь хадгалж, ирээдүйд үнэ цэнтэй соёлын өв хэлбэрээр үлдээх суурь нөхцөл бүрдэх юм.

Эх сурвалж: Монгол Улсын Засгийн газар