Цаг уур, орчны шинжилгээний газрын мэдээлснээр, 2025 оны наймдугаар сарын 6-ны байдлаар Хэрлэн (Мөнгөнморьт), Улз (Баянхошуу), Халх (Сүмбэр, Баянхошуу), Тэрэлж (Тэрэлж), Байдраг (Баянбүрд) голуудын усны түвшин өмнөх өдрөөс 5–10 см нэмэгдсэн байна. Үүнээс гадна Хархираа (Тариалан) болон Байдраг (Баянбүрд) голууд үерийн түвшинг 5–20 см-ээр даван үерлэж эхэлжээ.

Маргааш буюу наймдугаар сарын 7-нд төвийн аймгуудын ихэнх нутгаар болон зүүн аймгуудын нутгийн хойд хэсгээр дуутай аадар бороо орох төлөвтэй байгаа тул богино хугацаанд гол мөрний ус огцом нэмэгдэх, сайр, гуу жалгаар уруйн үер буух эрсдэл нэмэгдэхийг анхааруулж байна.

Иймд иргэд, аялагчид, малчид дараах сэрэмжлүүлгийг дагаж мөрдөхийг зөвлөж байна:

• Үерийн аюултай бүсээс хол, өндөрлөг газарт зусах

• Гол, нуурын ойролцоо амрах, хоноглохдоо усны түвшний өөрчлөлтийг ажиглаж байх

• Уулын ам, голын эрэг, үерийн буулттай газарт майхан, отог барихгүй байх

• Зөвхөн зөвшөөрөгдсөн зам, гүүрээр зорчих

• Салхитай, ширүүн бороотой үед гол, нуур гатлахгүй байх

Цаашид цаг агаарын нөхцөл байдал, борооны эрчимшил, голын түвшний өөрчлөлтийг тогтмол хянаж, аюулгүй байдлаа хангахыг Цаг уур, орчны шинжилгээний газар анхааруулж байна.

Эх сурвалж: Цаг уур, орчны шинжилгээний газар