Швед, Норвег, Дани улсууд Украиныг АНУ-ын зэвсгээр хангах НАТО-гийн тэргүүлсэн санаачилгад нэгдэж, нийт 500 сая орчим ам.долларын санхүүжилт үзүүлэхээр болсноо мягмар гарагт албан ёсоор мэдэгдлээ. Энэхүү дэмжлэг нь Украиныг “Патриот” пуужин болон бусад агаарын довтолгооноос хамгаалах систем, танк эсэргүүцэх сум зэрэг стратегийн зэвсгээр хангахад чиглэж байгаа юм.

Зэвсгийн нийлүүлэлтийг АНУ хариуцах бөгөөд Европын холбоотнууд үүний зардлыг хуваан төлөх зохицуулалтыг боловсруулж буйг АНУ-ын Ерөнхийлөгч Дональд Трамп өмнө нь мэдэгдэж байсан. Гэвч тус механизмыг хэрхэн хэрэгжүүлэх талаар тодорхой тайлбар хийгдээгүй хэвээр байна.

Норвегийн Батлан хамгаалахын сайд Торе О.Сандвик хэлэхдээ, энэ санаачилга нь зөвхөн Украиныг богино хугацаанд хамгаалахад бус, НАТО-гийн батлан хамгаалах хамтын ажиллагааг гүнзгийрүүлж, урт хугацаанд Европ даяар аюулгүй байдлын шинэ суурь тавих алхам хэмээн тодорхойлов. Тэрбээр “Украинд шаардлагатай техник хэрэгслийг хурдан шуурхай хүргэх нь бидний зорилго” гэв.

Украины Ерөнхийлөгч Володимир Зеленский энэхүү дэмжлэгийг НАТО-Америк-Европын эв нэгдлийн хүчтэй илэрхийлэл гэж үнэлсэн бөгөөд “уламжлалт аюул заналын эсрэг бодит хамгаалалт, ирээдүйн энх тайвныг бэхжүүлэх алхам” хэмээн X платформ дээрээ бичжээ.

Хандивласан дүнг харвал:

• Швед улс 275 сая ам.доллар

• Норвег улс 1.5 тэрбум норвеги крон буюу 146 сая ам.доллар

• Дани улс 90 сая ам.долларыг тус тус гаргахаар мэдэгдсэн байна.

Данийн Батлан хамгаалахын сайд Троэльс Лунд Поульсен хурдны чухлыг онцолж, шаардлагатай тохиолдолд нэмэлт санхүүжилт олгоход бэлэн байгаагаа илэрхийлсэн. Харин Шведийн Ерөнхий сайдын орлогч Эбба Буш “АНУ-ын батлан хамгаалахын стратегийн бүтээгдэхүүнийг Европоос бүрэн орлож чадахгүй байгаа өнөө үед ийм хэлбэрийн нийлүүлэлт Украины хувьд амин чухал” гэж онцоллоо.

НАТО-гийн Ерөнхий нарийн бичгийн дарга Марк Рютте Скандинавын гурван улсын шуурхай, бодит туслалцаанд гүн талархал илэрхийлж, энэ нь эвслийн бат бөх байдлын нэг илрэл хэмээн дүгнэв.

Эх сурвалж: Reuters.