ОПЕК+ бүлгийн орнууд газрын тосны олборлолтыг ирэх есдүгээр сараас эхлэн өдөрт 547 мянган торхоор нэмэгдүүлэхээр ням гаригт тохиролцжээ. Энэхүү шийдвэрнь энэ онд нефтийн үнийг улам бууруулж магадгүй юм.
Тус бүлэг газрын тосны олборлолтыг бууруулах шийдвэрээ бүрмөсөн өөрчилснийг дээрх алхам харуулж байгаа бөгөөд олборлолтоо нэмэгдүүлсэн ээлжит шийдвэр болж байна. Энэтхэг улс Оросын нефтийг худалдан авч байгааг хязгаарлахын тулд АНУ-аас шахалт үзүүлж буй энэ үед ОПЕК+ бүлгийн гишүүн найман орон цахим уулзалт хийсний дараа дээрх мэдэгдлийг хийжээ.
Уулзалтын дараа хийсэн мэдэгдэлдээ талууд “зах зээлийн нөхцөл байдал өөрчлөгдөж буйг харгалзан олборлолтыг сайн дурын үндсэн дээр зохицуулахыг түр зогсоох эсвэл цуцлах боломжтой” гэдгийг тэмдэглэсэн байна. Эдийн засгийн нөхцөл байдал хүнд байгаа, газрын тосны нөөц бага байгаа зэрэг нь олборлолтыг нэмэгдүүлэх шийдвэр гаргах гол шалтгаан болсныг мөн мэдэгдэлд дурджээ.
Тус бүлэг нефтийн үнийг өсгөхийн тулд сүүлийн хэдэн жилийн турш газрын тосны олборлолтыг бууруулж байсан боловч энэ оны эхээр АНУ-ын Ерөнхийлөгч Дональд Трамп олборлолтоо нэмэгдүүлэхийг уриалсны дараа шийдвэрээ өөрчилсөн юм.
ОПЕК+ бүлгийн бүрэлдэхүүнд ОПЕК-ийн бүх гишүүн орон, мөн Орос, Казахстан зэрэг ОПЕК-ийн гишүүн бус арван орон багтдаг. Тус хоёр байгууллагын үндсэн зорилго нь дэлхийн газрын тосны нийлүүлэлтийг зохицуулах, үнийг тогтворжуулах явдал юм.
ОПЕК+ ирэх есдүгээр сарын 7-нд дахин хуралдахаар товложээ.
Эх сурвалж: Euronews
