Америкийн Ерөнхийлөгч Дональд Трампын нэрлэснээр “маш сайхан билль” болох шинэ төсөв Конгрессоор дөнгөн данган батлагдлаа. Төлөөлөгчдийн танхимд 218 гишүүн дэмжиж, 214 гишүүн эсэргүүцсэн энэ төсөв нь улс төрийн хувьд ч, эдийн засгийн хувьд ч томоохон үр дагавартай гэж үзэж байна. Сенатад ч мөн саналууд тэнцэж, дэд ерөнхийлөгч Жей Ди Вэнс шийдвэрлэх санал өгсөн нь Цагаан ордонд ирээд байсан дарамтыг багасгав.

Тус төсвийг батлуулснаар Трамп өөрийгөө улс төрийн тууштай лидер гэдгээ нотолж, хууль тогтоох байгууллагатай амжилттай ажиллах чадвараа харууллаа. Тэр энэ төслөө АНУ-д “шилдэг бэлэг” хэмээн нэрлэж, тусгаар тогтнолын баярын өдөр буюу долдугаар сарын дөрөвний өдөр гарын үсэг зурсан юм. Түүнчлэн Ираны эсрэг В-1 бөмбөгдөгч онгоц нисгэн харуулсан нь хүчирхэг удирдагч гэдгээ дахин батлах гэсэн оролдлого гэж зарим шинжээч дүгнэжээ.

Энэ төсөвт юу тусгагдсан бэ?

• Корпораци болон чинээлэг иргэдийн татварыг бууруулах замаар хөрөнгө оруулалтыг нэмэгдүүлж, эдийн засгийг урагшлуулах зорилготой.

• Улсын өрийг таван их наяд доллар болтол өсгөх ч ажлын байр болон өсөлтөөр нөхнө гэж үзсэн.

• Батлан хамгаалахын зардлыг нэг их наяд доллар хүртэл нэмэгдүүлж, цөмийн зэвсэг шинэчлэх, Мексикийн хилийн хана, цагаачлалын албыг өргөжүүлэх зэрэгт зарцуулна.

• Нийгмийн халамжийн зардлыг нэг их наяд доллароор танаж, хариуцлагыг мужуудад шилжүүлнэ. Үүнд Medicaid, хүнсний тусламж, орон сууцны хөтөлбөрүүд орно.

Харин эсэргүүцэгчдийн зүгээс:

• 12 сая хүн эмнэлгийн даатгалгүй болж, нийгмийн үйлчилгээний чанар муудах эрсдэлтэй гэв.

• Татварын бууралт голчлон чинээлэг иргэдэд ашигтай байх тул нийгмийн тэгш байдал алдагдана.

• Батлан хамгаалахын зардал хэт өссөнөөс бусад салбар хохирч, нийгмийн тогтвортой байдалд сөргөөр нөлөөлж болзошгүй.

Гэсэн ч төсөв батлагдсан нь:

• АНУ-ын дэлхийн лидер байхын тулд эдийн засаг, цэрэг-улс төрийн хүч чадлаа тэлэх зайлшгүй шаардлагын хүрээнд хийгдсэн алхам гэж тайлбарлагдаж байна.

• Урт хугацааны өсөлт, өрсөлдөх чадварыг нэмэгдүүлэх зорилт нь Конгресс дахь зарим төв үзэлтнүүдийн дэмжлэгийг татсан.

Эцэст нь, Трампын батлуулсан энэ төсөв бол зөвхөн тоон үзүүлэлт бус улс төрийн тодорхой мессеж юм. Энэ нь хүчирхэг удирдлагын дохио өгөхөөс гадна Трампын хоёр дахь бүрэн эрхийн хугацааны бодлогын суурь баримт бичиг болон хувирч магадгүй байна.

Эх сурвалж: Iz.ru.