АНУ-ын Төрийн нарийн бичгийн дарга Марко Рубио мягмар гарагт мэдэгдэл хийж, АНУ-ын Олон улсын хөгжлийн агентлаг (USAID)-ийг хаах шийдвэрийг албан ёсоор гаргаснаа зарлалаа гэж DW мэдээлжээ. Тэрбээр Д.Трампын засаг захиргаа USAID-ийн олон арван жилийн турш хэрэгжүүлсэн төсөл, хөтөлбөрүүдийг шалгаж, инфляцийн нөлөөг тооцсон дүнгээр нийт 715 тэрбум гаруй долларын зардал гаргасан ч хөгжлийн зорилтод хүрч чадаагүй гэж үзсэн тухай тайлбарласан байна.

Мөн USAID-ээс хамгийн их тусламж авсан улс орнууд АНУ-ын бодлогыг хангалттай дэмжээгүй хэмээн шүүмжилсэн бөгөөд жишээлбэл, 1991 оноос хойш 165 тэрбум долларын тусламж авсан Сахарын цөлөөс урагш орших Африкийн улсууд НҮБ-ын чухал тогтоолуудын дөнгөж 29 хувьд нь АНУ-ын байр суурийг дэмжсэн байна гэж Рубио онцолсон юм.

Иймд USAID-ийн зарим чиг үүргийг Төрийн департаментад шилжүүлж, тайлан тооцоог илүү ил тод, стратегийг илүү оновчтой болгож, богино хугацаанд үр дүн өгөх шинэ загварыг хэрэгжүүлнэ гэж мэдэгдэв. Цаашдаа “тусламжийн оронд худалдаа” гэсэн зарчмыг баримтлан, тусламжийг илүү зорилтот, хэрэгцээтэй газарт чиглүүлнэ гэж Рубио тодотгожээ.

Гэсэн хэдий ч USAID хаагдсанаар ирэх таван жилийн хугацаанд дэлхий даяар 14 сая гаруй хүн, тэдний дотор таван сая орчим тав хүртэлх насны хүүхэд амь насаа алдана гэсэн эрсдэлтэй гэж Барселона, Бразилын Салвадор хотын эрдэмтэд дүгнэсэн байна. Учир нь USAID-ийн сүүлийн хорин жилийн хугацаанд хэрэгжүүлсэн төсөл, хөтөлбөрөөр дамжин 92 сая орчим хүний, үүнээс 30 сая гаруй нь тав хүртэлх насны хүүхдийн амь аврагдсан болохыг тэд онцолсон юм.

USAID-ийг татан буулгах шийдвэрээ Төрийн департамент гуравдугаар сарын сүүлчээр Конгресст илгээсэн бөгөөд Д.Трамп ерөнхийлөгчөөр сонгогдон тангараг өргөсний дараа тус агентлагаас үзүүлдэг олон улсын тусламжийг 90 хоногийн хугацаанд зогсоож, нийт хөтөлбөрүүдийн 83 хувийг зогсоосон талаар мөн дурдсан байна.

Эх сурвалж: DW