АНУ-ын Ерөнхийлөгч асан Дональд Трамп Иран улс цөмийн хөтөлбөрөө дахин сэргээх тохиолдолд АНУ цөмийн байгууламжуудад нь дахин цохилт өгөхөөс буцахгүй гэж мэдэгдлээ. Тэрбээр энэ тухайгаа лхагва гарагт Хааг хотноо эхэлсэн НАТО-гийн дээд хэмжээний уулзалтын өмнөхөн илэрхийлсэн байна.

Д.Трампын хэлснээр, Америкийн өмнөх цохилтууд Ираны цөмийн хүчин чадлыг “бүрэн устгасан” бөгөөд “цөмийн хөтөлбөрийг нь арван жилээр ухраасан” аж. Харин энэ байр суурийг АНУ-ын тагнуулын зарим албад няцааж, тухайн цохилт хэдхэн сарын хугацаанд нөлөөлсөн хэмээн дүгнэсэн байдаг. Тухайлбал, Пентагоны дэргэдэх тагнуулын газар Ираны цөмийн төслийн үндсэн бүтэц бүрэн устгагдаагүй гэж үзсэн бөгөөд энэ талаар “CNN”, “The New York Times” зэрэг хэвлэлүүдэд мэдээлж байв. Харин Трамп дээрх мэдээллүүдийг “үндэслэлгүй” хэмээн эрс няцааж, шүүмжилсэн юм.

Тэрбээр мөн зургаадугаар сарын 22-нд Иранд өгсөн агаарын цохилтуудыг Дэлхийн Хоёрдугаар дайны үеийн Хирошима, Нагасакийн атомын бөмбөгтэй зүйрлэсэн нь анхаарал татаж байна. “Энэ бол дайныг дуусгасан жишээтэй адил үйл явдал байсан” хэмээн тэр тайлбарлажээ.

Трампын байр суурь нь цаашид ч хатуу хэвээр байгааг илтгэж байгаа бөгөөд хэрвээ тухайн үед АНУ Ираны байгууламжуудад цохилт өгөөгүй байсан бол Израил, Ираны хоорондох зэвсэгт мөргөлдөөн одоо ч үргэлжилж байх байлаа гэж үзэж буйгаа ч хэлсэн байна.

Израил, Ираны хооронд тогтсон гал зогсоох тохиролцоо “маш сайн хэрэгжиж байгаа”-г ч онцолж, цаашид ч Америк энэ асуудалд идэвхтэй оролцсоор байх болно гэдгийг илэрхийллээ.

Трамп энэ удаагийн мэдэгдлийнхээ хүрээнд B-2 бөмбөгдөгч онгоцны зургуудыг “Truth Social” сүлжээнд нийтлэхдээ "Vince Vance & the Valiants" хамтлагийн “Bomb Iran” хэмээх дууг хавсаргасан нь олон нийтийн анхаарлыг татсан байна.

Энэхүү үйл явдал нь Ираны цөмийн хөтөлбөрийг тойрсон олон улсын хурцадмал байдал бүрэн намжаагүй, АНУ-ын зүгээс энэ асуудалд дахин хүчтэй байр суурь баримтлахыг үгүйсгэхгүй байгааг харуулж байна.

Эх сурвалж: DW