Он гарсаар Монгол Улсын хэмжээнд нийт 129 удаагийн ой, хээрийн гал түймэр бүртгэгдээд байгаа талаар Онцгой байдлын ерөнхий газраас мэдээллээ. ОБЕГ-аас түймрийн нөхцөл байдал болон авсан арга хэмжээний талаар өнөөдөр /2025.06.26/ УОК-ын Нарийн бичгийн дарга, хурандаа Т.Баярхүү, ОБЕГ-ын Гал түймэртэй тэмцэх газрын хэлтсийн дарга, дэд хурандаа П.Соронзонболд нар хэвлэлд мэдээлэл хийв.

Хурандаа Т.Баярхүүгийн мэдээлснээр, энэ оны эхний хагас жилийн байдлаар 12 аймгийн 64 сум, нийслэлийн 3 дүүрэгт ой, хээрийн 129 удаагийн түймэр бүртгэгдсэн бөгөөд энэ нь өнгөрсөн оны мөн үетэй харьцуулахад 44.1 хувиар нэмэгдсэн үзүүлэлт болжээ. Эдгээр түймрийн улмаас урьдчилсан байдлаар нийт 639 мянган га газарт хохирол учирсан байна. Үүнээс ойн 63,659 га, хээрийн 576,262 га талбай шатсан байна. Мөн 5 байшин, 49 гэр, 5 автомашин, 7 мотоцикл, 125 малын хашаа, 5937 бог, 470 бод мал, 7980 боодол өвс, 80 шуудай тэжээл шатаж, ойролцоогоор 6 орчим тэрбум төгрөгийн шууд хохирол учирсан гэдгийг дурдав.

2025 оны зургадугаар сарын 26-ны 11:00 цагийн байдлаар Төв аймгийн Эрдэнэ сум, Сэлэнгэ аймгийн Хүдэр, Алтанбулаг сумын "Гурван цагаан толгой", "Хазай", "Орос даваа" зэрэг газруудад түймэр гарсан байна. Үүнээс гадна Дорнод аймгийн Баян-Уул, Булган аймгийн Тэшиг, Сэлэнгэ аймгийн Ерөө, Цагааннуур, Алтанбулаг, Хөвсгөл аймгийн Улаан-Уул, Цагааннуур сумдад нийт 5 аймгийн 9 суманд 14 удаагийн ой, хээрийн гал түймрийн нөхцөл байдал үргэлжилж байгаа бөгөөд түймрийг бүрэн унтраахаар шуурхай арга хэмжээ авч хэрэгжүүлж байна.

Түймрийн голомтод ОБЕГ-ын Гал түймэртэй тэмцэх газрын дарга, хурандаа Ц.Нямбаяраар ахлуулсан аврах баг, Онцгой байдлын ерөнхий газар, нийслэл болон орон нутгийн Онцгой байдлын газар, Үндэсний аврах бригад, уул уурхайн аврах ангиуд, орон нутгийн мэргэжлийн ангиуд идэвхтэй ажиллаж байна. Нийтдээ улсын хэмжээнд 420 алба хаагч, 25 автомашин, зэвсэгт хүчний нэг нисдэг тэрэг, 243 иргэн 53 автомашинтайгаар буюу нийт 663 хүн, 78 автомашин, техник хэрэгсэл түймрийн голомтод ажиллаж байгаа аж.

Цаашид хуурайшилтын түвшин өндөр, салхи шуургатай өдрүүд үргэлжлэх төлөвтэй байгаа тул иргэдэд болгоомжтой байхыг анхааруулж, ой, хээрийн бүсэд ил задгай гал гаргахгүй байх, түймэр илэрсэн тохиолдолд шуурхай мэдээлэхийг уриалж байна.

Эх сурвалж: ОБЕГ, УОК