Архангай аймгийн Төвшрүүлэх сумын Баян-Өндөр багийн “Дээд булаг” гэх газар 2025 оны зургаадугаар сарын 25-ны өдрийн 06:06 цагт 3.7 магнитудын хүчтэй газар хөдлөлт болжээ. Газар хөдлөлтийн төв нь аймгийн төвөөс зүүн зүгт 52 км, сумын төвөөс зүүн хойд зүгт 15 км зайд, 47°27'00.0"N, 102°04'48.0"E координатын дагуу бүртгэгдсэн байна.

Газар хөдлөлтийн талаар анхны мэдээллийг 06:17 цагт Одон орон, геофизикийн хүрээлэнгээс цахим шуудангаар хүргүүлжээ. Улмаар Архангай аймгийн Онцгой байдлын газар тухайн мэдээллийг шуурхай дамжуулан, Төвшрүүлэх сумын Баян-Өндөр багийн дарга болон тухайн бүс нутагт амьдарч буй малчнаас газар дээр нь нөхцөл байдлыг тодруулсан байна.

Иргэдийн мэдээлж буйгаар газар хөдлөлтийн үед гэрийн тооно шажигнаж, чичирхийлэл мэдрэгдсэн ч ямар нэгэн хохирол учраагүй байна. Онцгой байдлын байгууллагаас одоогоор нэмэлт хохирол бүртгэгдээгүй бөгөөд хяналт, мэдээлэл цуглуулах ажиллагааг үргэлжлүүлж байна.

Эх сурвалж: ООГХ, Архангай аймгийн Онцгой байдлын газар