Сэлэнгэ аймгийн Засаг дарга А/333 тоот захирамжаар зургаадугаар сарын 25-наас эхлэн тус аймгийн хэмжээнд гамшгаас хамгаалах өндөржүүлсэн бэлэн байдлын зэрэгт шилжүүллээ. Энэ шийдвэр нь аймагт нэгэн зэрэг таван ойн түймэр дэгдсэнтэй холбоотой бөгөөд ойн гал түймрийн нөхцөл байдал хүндэрч байгааг илтгэж байна.

Өчигдөр өглөөний байдлаар улсын хэмжээнд зургаан түймэр бүртгэгдсэн бол оройн үед энэ тоо арван гурван болж огцом нэмэгдсэн байна. Эдгээрээс хамгийн олон нь буюу тав нь Сэлэнгэ аймагт бүртгэгджээ. Ойн түймэр дараах газруудад гарсан байна:

• Алтанбулаг сумын Цөх 3-р баг, Доргонтолгой

• Цагааннуур сумын Оргих 1-р баг, Товхонхан уулын ар Хоорондын ам

• Ерөө сумын Буурагчин 2-р баг, Даваат

• Ерөө сумын Буурагчин 2-р баг, Ялбагийн Асгатын ам

• Түшиг сумын Жаргалмандах 1-р баг, Самданшовх

Түймэр унтраах ажиллагаанд ОБЕГ-ын Гал түймэртэй тэмцэх газрын дарга, хурандаа Ц.Нямбаяр, Сэлэнгэ аймгийн ОБГ-ын дарга хурандаа С.Пүрэвсамдан нар удирдлагаар оролцож байна. Үндэсний аврах бригад, Нийслэлийн онцгой байдлын газар, Сэлэнгэ, Дархан-Уул, Орхон, Булган аймгуудын Онцгой байдлын газрын алба хаагчид, мөн түүнчлэн Алтанбулаг, Түшиг, Цагааннуур, Мандал, Ерөө сумдын ЗДТГ, сумдын мэргэжлийн анги, Тужийн нарсны цогцолборт газрын хамгаалалтын захиргаа, орон нутгийн иргэд идэвхтэй ажиллаж байна.

Онцгой нөхцөл байдал үүссэнтэй холбоотойгоор сумдын Онцгой комиссууд шуурхай хуралдаж, мэргэжлийн анги, хүн хүч, техник хэрэгсэл, нөөц бололцоогоо дайчлан ажиллаж эхэлжээ. Галын голомтууд ойд дэгдсэн учраас унтраах ажиллагаа хүндрэлтэй байгаа ч холбогдох байгууллагууд байгаль хамгаалал, аюулгүй байдлыг хангах чиглэлээр бүх хүчин чадлаа дайчлан ажиллаж байна.

Эх сурвалж: Сэлэнгэ аймгийн ЗДТГ, ОБЕГ.