Өнөөдрийн байдлаар Монгол Улсад Хөвсгөл, Сэлэнгэ, Төв аймгийн нийт 6 газарт ойд гарсан түймэртэй байгааг Онцгой байдлын ерөнхий газраас мэдээллээ. Эдгээр түймрүүдийн ихэнх нь хиймэл дагуулын сансрын зургаар илэрч, олон байгууллагын хамтын ажиллагаатайгаар унтраах ажиллагаа үргэлжилж байна.

Төв аймаг

• Эрдэнэ сумын Баянтуул багийн Тэргийн голд зургаадугаар сарын 19-нд илэрсэн түймрийг ОБЕГ, Үндэсний аврах бригад, Хан Хэнтийн тусгай хамгаалалттай газрын 63 алба хаагч, 2 автомашин, 4 морьтойгоор оролцон зургаадугаар сарын 24-нд 09:25 цагт цурманд оруулжээ.

Сэлэнгэ аймаг

• Алтанбулаг сумын Цөх багийн Доргонтолгой: Зургаадугаар сарын 22-нд гарсан түймэр дээр Сэлэнгэ аймгийн ОБГ, 36, 61 дүгээр ангиуд, Тужийн нарсны хамгаалалтын захиргаа, нутгийн иргэд 4 чиглэлд хуваагдан унтраах ажиллагаа явуулж байна.

• Түшиг сумын Санданшовх: Зургаадугаар сарын 23-нд гарсан түймэр 24-ний 19:05 цагт цурманд оржээ.

• Цагааннуур сумын Оргих баг, Товхонхан уулын ард: Зургаадугаар сарын 23-нд илэрсэн түймэрт Сэлэнгэ, Дархан-Уул аймгийн ОБГ, нутгийн иргэд хамтран ажиллаж байна.

Хөвсгөл аймаг

• Цагааннуур сумын Урд-Агяа тайгад: Зургаадугаар сарын 22-нд илэрсэн. ОБГ, Үндэсний аврах бригад, байгаль хамгаалагчид ажиллаж байна.

• Улаан-Уул сумын Соёо баг, Жологийн эхэнд: Зургаадугаар сарын 24-нд “Ми-171” нисдэг тэрэг ашиглан Зэвсэгт хүчний 303 дугаар анги, ОБГ-ын 43 алба хаагчийг газардуулж, 2 удаа нислэг үйлдэн түймрийн голомт руу зөөвөрлөлт хийжээ.

Бүх түймэр ойн бүсэд гарсан бөгөөд заримыг нь цурманд оруулсан, зарим нь бүрэн унтраагдаагүй, хяналттай байдалд байгаа юм. Онцгой байдлын албаныхан, цэрэг, хамгаалалтын байгууллагууд болон иргэд хамтран унтраах ажиллагааг тасралтгүй үргэлжлүүлж байна.

Эх сурвалж: Онцгой байдлын ерөнхий газар