Иран, Израилийн хооронд байгуулсан гал зогсоох тохиролцоо хүчин төгөлдөр хэрэгжиж эхэлснийг мэдэгдсэний дараа Иранаас Израиль руу пуужин харвасан гэх мэдээлэл гарсан ч тус мэдээллийг Ираны тал албан ёсоор няцаалаа. Ираны төрийн телевиз, радиогийн нэгдэл болох IRIB компанийн мэдээлснээр, тухайн мэдээлэл худал бөгөөд ямар ч пуужин харваагүй болохыг Ираны Зэвсэгт хүчний жанжин штаб баталжээ.
Мөн Ираны Үндэсний аюулгүй байдлын дээд зөвлөл гал зогсоох тохиролцоонд Ираны тал үнэнчээр хандаж, түүнийг мөрдөж байгаагаа мэдэгдсэн байна. Гэсэн ч тэд Израилийн талаас ямар нэгэн түрэмгийлэл үйлдэгдсэн тохиолдолд хариу цохилт өгөхөд бэлэн гэдгээ илэрхийлжээ.
Гал зогсоох тохиролцооны талаар АНУ-ын Ерөнхийлөгч Дональд Трамп мягмар гарагт шилжих шөнө мэдэгдэл хийсэн бөгөөд уг тохиролцоо нь 12 хоног үргэлжилсэн мөргөлдөөнд цэг тавих зорилготой байв. Трампын хэлснээр, Иран эхлээд галаа зогсоож, 12 цагийн дараа Израиль галаа зогсоох нөхцөлтэй байсныг онцолжээ.
Гэвч хоёр тал гал зогсоосон талаараа мэдэгдсэний дараа Иранаас Израилийн хойд нутаг руу пуужин харвасан хэмээн Израилийн Kan телевиз өнөөдөр өглөө мэдээлсэн байна. Харин Иран энэ мэдээллийг эрс няцааж, ямар ч халдлага үйлдээгүй хэмээн тодруулга өглөө.
Эх сурвалж: RIA Novosti, IRIB, Kan TV
