Катарын Аль Удейд агаарын бааз дахь Америкийн цэргүүд рүү Иран халдсан тухай тус улсын төрийн телевиз мэдэгдэв. Телевизийн дэлгэц дээр “Америкийн түрэмгийллийн эсрэг Ираны зэвсэгт хүчний хүчирхэг бөгөөд амжилттай хариу үйлдэл” хэмээн бичсэн байжээ. Энэхүү довтолгоо Катар улс агаарын хилээ хаасны дараа буюу Ираны болзошгүй агаарын цохилтоос урьдчилан сэргийлэх үүднээс авсан арга хэмжээний дараа болсон нь анхаарал татаж байна.

Ираны цохилтын дараа Катар улс олон улсын эрх зүйн хүрээнд өөрийгөө хамгаалах эрхтэй гэдгээ зарлаж, уг халдлагын улмаас хохирол учраагүй болохыг мэдэгдсэн. Мөн Тегеран талаас энэхүү агаарын довтолгоог явуулахын өмнө хохиролыг багасгах зорилгоор анхааруулга өгсөн талаар эх сурвалжууд дурджээ.

АНУ-ын зүгээс Ираны дахин халдлага үйлдэхгүй бол Израиль гал зогсоохыг зөвшөөрсөн тухай Цагаан ордны төлөөлөгч мэдээлсэн. Reuters агентлагийн мэдээлснээр, Иран АНУ-д довтолгоог үргэлжлүүлэхгүй гэдгээ мэдэгдэж, Катар улс энэ хэлэлцээг зуучилж, Катарын Ерөнхий сайд Тегерантай утсаар тохиролцоонд хүрсэн байна. Гэсэн ч Ираны Гадаад хэргийн сайд Сейед Аббас Арагчи “цэргийн ажиллагааг зогсоох” болон “гал зогсоох” тухай ямар ч тохиролцоонд хүрээгүй гэж X (хуучнаар Твиттер) хуудсандаа онцолсон. Гэсэн ч тэрбээр Израиль өглөөний 04.00 цагаас өмнө довтолгоогоо зогсоовол Иран хариу арга хэмжээгээ зогсоох боломжтой гэсэн байр суурь илэрхийлжээ.

Израилийн Батлан хамгаалах арми Тегеран хотын зарим бүсэд төлөвлөж буй довтолгооны өмнө ард иргэдийг яаралтай нүүлгэн шилжихийг анхааруулсан бөгөөд “Ираны дэглэмийн цэргийн дэд бүтцийг устгахад чиглэсэн ажиллагааг Иран даяар явуулж байна” гэж мэдэгдсэн. Түүнчлэн олон нийтийн сүлжээнд Тегеранд хүчтэй дэлбэрэлт болсон талаарх мэдээллүүд тархсан нь Израилийн эхлүүлсэн 12 хоногийн дайны хамгийн хүчтэй цохилт болж магадгүй гэж үзэж байна.

Энэ бүх үйл явдлын дунд АНУ-ын Ерөнхийлөгч Дональд Трамп “Truth Social” платформ дээр байр сууриа илэрхийлж, “Израиль болон Иран энхийн хэлэлцээ хийхэд бэлэн гэдгээ илэрхийлсэн. Хоёр улс ирээдүйд хайр, энх тайван, хөгжил дэвшилд хүрнэ гэдэгт итгэж байна” гэж бичжээ.

Эцэст нь Ираны ГХЯ-ны сайд Сейед Аббас Арагчи өөрийн жиргээнд “Манай Зэвсэгт хүчний цохилт үүрийн 04.00 цаг хүртэл үргэлжилсэн. Эх орноо хамгаалахын төлөө эцсийн дусал цусаа ч зориулахад бэлэн дайчдаараа бахархаж байна” хэмээн бичсэн байна.

Эх сурвалж: Reuters, Al Jazeera, Fars News, Truth Social.