Катарын зуучлалаар АНУ-аас дэвшүүлсэн гал зогсоох саналыг Иран хүлээн авсан тухай мэдээллийг тус улсын өндөр албан тушаалтан баталсан гэж “Reuters” агентлаг уламжиллаа. Энэхүү санал нь Израиль, Ираны хооронд 12 хоног үргэлжилсэн хурц сөргөлдөөнийг зогсоох зорилготой бөгөөд олон улсын анхаарлыг ихээр татаж байна.
АНУ-ын Ерөнхийлөгч Дональд Трамп гал зогсоох тохиролцооны талаар өмнө нь өөрийн “Truth Social” цахим хуудсанд мэдэгдэл хийсэн. Тэрээр “Израиль, Иран бүрмөсөн гал зогсоох тохиролцоонд хүрлээ. Талууд ажиллагаагаа дуусгаснаас хойш зургаан цагийн дараа хэрэгжиж эхэлнэ. Харин тохиролцоо 12 цаг хэрэгжсэний дараа дайн албан ёсоор дууссанд тооцогдоно” хэмээн онцолсон байна.
Трампын хэлснээр, уг тохиролцоо нь Ойрх Дорнодыг бүхэлд нь сүйрэлд хүргэж мэдэх байсан өргөн цар хүрээтэй мөргөлдөөнийг зогсоосон чухал алхам болж байгаа юм. Мөн тэрбээр “Бүгдэд нь баяр хүргэе” хэмээн онцолж, энэхүү шийдвэр нь бүс нутгийн тогтвортой байдалд эерэг нөлөө үзүүлнэ гэдэгт найдаж байгаагаа илэрхийлжээ.
Энэхүү гал зогсоох тохиролцоо ойрын хугацаанд бодитоор хэрэгжиж эхэлснээр бүс нутгийн улс төр, аюулгүй байдлын нөхцөл байдал шинэ чиглэлд шилжих, олон улсын дипломат ажиллагаанд эерэг дохио болох хүлээлттэй байна.
Эх сурвалж: Reuters, Truth Social.
