ОХУ-аас өглөө эрт Киевийн бүс рүү чиглүүлэн хийсэн пуужин болон дроны довтолгооны улмаас доод тал нь есөн хүн амиа алдаж, хэд хэдэн хүн гэмтсэн тухай Украины Дотоод хэргийн сайд Игорь Клименко мэдээллээ. Түүний хэлснээр довтолгоо орон сууцны бүс, эмнэлэг, спортын байгууламжийг онилсон байв.

Киев хотын дарга Виталий Кличкогийн хэлснээр, амиа алдсан хүмүүсийн зургаа нь өндөр барилгад байсан байна. Нийслэлийн цэргийн захиргааны мэдээлснээр, нэмж 33 хүн шархаджээ.

Украины агаарын хүчний мэдэгдсэнээр, энэхүү сүүлчийн давалгаанд 352 дрон, 16 пуужин ашиглагдсан бөгөөд ихэнх нь Киев орчмыг онилсон байв. Эдгээр нь Украины агаарын довтолгооноос хамгаалах системийг дарах зорилготой олон давхар довтолгоо байсан гэж үзэж байна.

Амьд үлдсэн иргэдийн яриа

33 настай оршин суугч Валерий Манкута “нурангид сэрсэн” хэмээн Ройтерс агентлагт ярьжээ. Түүний амьдарч байсан байр шууд мөргүүлсэн бөгөөд тэрбээр цонхоор гарч амьд гарчээ. “Нүүрэн дээр тоосго, ам руу юм орчихсон байв. Бүх зүйл там шиг байсан” гэж тэр хэлсэн байна.

Өөр нэг оршин суугч Наталья Маршавска байшингийнхаа дээгүүр дроны дуу гарсны дараа тэсрэлт болсон, түүнээс болж өрөөндөө шидэгдэн, бүх цонх хагарсан гэж AFP агентлагт ярьжээ. “Утаа бүх тийш хөвсөрсөн. Аймшигтай байсан” хэмээн нэмж дурджээ.

Эмнэлэг, метро, их сургуулиуд руу цохилт өгчээ

• Киеврүү өгсөн дайралтад олон нийтийн орон сууц, метроны гарц, их сургуулийн анги танхим, оюутны дотуур байр хүртэл өртсөн байна.

• Мөн нийслэлийн хажуугийн Била Церква хотод эмнэлэг рүү дрон цохиж, нэг хүн амь үрэгдсэн тухай мэдээлжээ.

• Өмнөд хэсгийн Одесса мужид болсон өөр нэг довтолгоонд хоёр хүн амиа алдаж, арван хэдэн хүн шархадсан байна.

Ерөнхийлөгч Зеленский Одессад сургууль бараг бүрэн устсан гэж мэдэгдэж, Оросын цохилтууд нь “санаандгүй тохиолдол биш, тэд яг хаана чиглүүлэхээ мэдэж байна” гэж онцлон хэлжээ.

Украин сөрөг довтолгоогоо эрчимжүүлнэ

Украины зэвсэгт хүчний командлагч Александр Сирский Киевт болсон хэвлэлийн хурлын үеэр “зөвхөн хамгаалалт хийх нь сүүлдээ ухрах, хүн хүч, газар нутгаа алдах эрсдэлийг дагуулдаг” хэмээн сөрөг довтолгоог эрчимжүүлэхээ мэдэгдлээ.

Цаашдын дипломат үйл явц зогсонги байдалд байна

Өнгөрсөн долоо хоногт Киевт болсон Оросын хамгийн хүчтэй довтолгооны дараах байдал бүрэн сэргээгүй байгаа энэ үед, энхийн яриа хэлэлцээ урьдын адил зогсонги байдалд оржээ. Хоёр тал сүүлд зөвхөн цогцос болон хоригдлуудын солилцоо хийх тохиролцоонд хүрсэн бөгөөд шинэ хэлэлцээ товлоогүй байна.

Ерөнхийлөгч Зеленский өнгөрсөн долоо хоногт G7 дээд хэмжээний уулзалтын үеэр Дональд Трамптай уулзахаар төлөвлөж байсан ч, Трамп Ойрх Дорнодын хурцадмал байдлын улмаас уулзалтыг цуцалжээ.

Харин маргааш Нидерландад эхлэх НАТО-гийн дээд хэмжээний уулзалтад Зеленский оролцож, оройн зоогт уригдаад байна.

Эх сурвалж: BBC News, Reuters, AFP