раны дээд удирдагч Аятолла Али Хаменеигийн эрүүл мэндийн байдалд төдийгүй улс төрийн ирээдүйд олон улсын анхаарал хандсаар байна. Сүүлийн өдрүүдэд АНУ-ын Ерөнхийлөгч асан Дональд Трамп Исламын Бүгд Найрамдах Улсад "дэглэм солигдохыг үгүйсгэхгүй" гэж мэдэгдсэний дараа, Хаменеигийн халааг хэн авбал зохих талаар өргөн хэлэлцүүлэг өрнөж эхэлжээ.

Д.Трампын хэлснээр, “Иранд том асуудал үүсэж магадгүй. Юу ч болж болно. Эцсийн шийдвэрийг би секундын өмнө л гаргадаг.” Түүний энэ мэдэгдэл нь Вашингтоны зүгээс дэглэм солих санаа үүсч буйг илтгэж байна. АНУ-ын Батлан хамгаалахын сайд Пит Хегсет ч “аль ч хувилбарт зориулсан бэлтгэл Америкийн армид бий” хэмээн онцолжээ.

Ираны дээд удирдагчийг томилдог Шинжээчдийн зөвлөл хэдийнэ гурван боломжит залгамжлагчийг дотроо сонгон хэлэлцэж байгаа тухай мэдээлэл 2024 оны арваннэгдүгээр сард цацагдсан ч нэрсийг нь одоо болтол зарлаагүй хэвээр байна. Гэхдээ улс төрийн шинжээчид дараах нэрсийг онцолж байна:

1. Можтаба Хаменеи
Хаменеигийн хүү Можтаба нь 55 настай, улс төрийн албан тушаал хашдаггүй ч эцгийнхээ нөлөөгөөр нууц хөшигний ард хүчтэй нөлөөлж ирсэн. Түүнийг Исламын хувьсгалын манаа, “Кудс” хүчин, “Басиж” бүлэглэлтэй холбоотой гэж АНУ үзэн 2019 онд хориг тавьсан байдаг. Гэхдээ сонгогчдын дэмжлэг сул, туршлагагүй ч гэж үздэг хэсэг бий.

2. Алиреза Арафи
Хаменеигийн итгэмжлэгдсэн хүн бөгөөд Шинжээчдийн зөвлөлийн дэд дарга, Үндсэн хуулийн манаа зөвлөлийн гишүүн. Канад түүнийг хүний эрх зөрчдөг байгууллагуудтай холбоотой гэж үзэн хориг тавьжээ. Тэр “Аль-Мустафа” олон улсын исламын сургуульд удирдлагын үүрэг гүйцэтгэж, Күм хотын шашны элит хүрээнд хүчээ авсан байна.

3. Сейед Хашем Хоссейни Бушехри
Шинжээчдийн зөвлөлийн даргын нэгдүгээр орлогч, шашны нөлөө бүхий Кум хотын төлөөлөл. Хаменеигийн ойрын хүрээлэлд тооцогддог.

Мөн дараах нэр дэвшигчид нэрлэгдээд байна:

• Али Асгара Хежази — Хаменеигийн аюулгүй байдлыг хариуцдаг, тагнуулын байгууллагуудыг хянадаг.

• Мохаммад Голпайгани — Лидерийн албан бичиг, олон нийттэй харилцах асуудлыг хариуцдаг хэт консерватив удирдлага.

• Голам Хоссейн Мохсени Эджеи — Шүүх, тагнуулын салбарт олон жил ажилласан, хууль зүйн хатуу байр суурьтай улстөрч.

Ираны улс төрийн ирээдүй, дотоод бүтэц цаашид хэрхэн өөрчлөгдөх нь зөвхөн Хаменеигийн хувь заяанаас бус, АНУ-ын стратегийн алхмаас ч мөн хамаарах хандлагатай болж байна.

Эх сурвалж: Newizv.ru.