Цаг уурын байгууллагаас мэдээлснээр, зургаадугаар сарын 23-ны өдөр буюу өнөөдөр Монгол орны ихэнх нутгаар 30 хэмээс дээш хална. Мөн баруун, төв болон говийн зарим хэсгээр дуу цахилгаантай, түр зуурын аадар бороо орох төлөвтэй байна. Тиймээс малчид, тээвэрчид болон аялж, зугаалж буй иргэдийг наршилт, аянга, мөндөр, нөөлөг салхинаас сэрэмжтэй байхыг анхааруулжээ.

Өнөөдрийн байдлаар Улаанбаатар хот орчимд үүлшинэ. Дуу цахилгаантай бага зэргийн бороо орох төлөвтэй бөгөөд өдөртөө 32–34 хэм дулаан байна. Багануур орчмоор 31–33 хэм, Тэрэлжийн бүс нутагт 30–32 хэм хүртэл хална. Салхи нийт нутгаар баруун өмнөөс секундэд 4–10 метр байх ч борооны өмнө түр зуур ширүүсэх боломжтой.

Улсын хэмжээнд Алтай, Хангай, Хөвсгөлийн уулархаг бүс, Хүрэнбэлчир, Завхан голын эхээр 22–27 хэм, харин Дорнод-Дарьгангын тал, Сэлэнгэ, Хэрлэн, Халх, Онон голын хөндий, говийн зүүн өмнөд хэсгээр 33–38 хэм хүртэл хална. Бусад нутгаар 28–33 хэмийн дулаан үргэлжилнэ.

Цаашдын тав хоногийн урьдчилсан төлөв:

• Зургаадугаар сарын 24-нд Алтай, Хангай, Хөвсгөл болон говийн баруун хэсгээр

• 25-нд баруун болон төвийн нутгийн зарим хэсэг, говийн баруун бүсээр

• 26-нд төв болон говийн зарим газраар

• 27-нд баруун, зүүн болон төвийн нутгийн баруун хэсгээр
  дуу цахилгаантай, аадар бороо орох төлөвтэй байна.

Хүчтэй бороо, салхины өмнөх ширүүсэл, мөн халууны эрч нэмэгдэх тул иргэдийг цаг агаарын мэдээг сайтар анхаарч, эрсдэлээс сэргийлэхийг уриалж байна. Ялангуяа говь болон тал хээрийн бүс нутагт шөнөдөө 18–23 хэм, өдөртөө 34–39 хэм хүртэл хална. Уулархаг болон хөндий газруудаар 21–26 хэм, бусад нутгаар 29–34 хэм байна. Харин энэ сарын 25-наас хойш зарим бүс нутгаар бага зэрэг сэрүүсэх төлөвтэй байна.

Эх сурвалж: Цаг уур, орчны шинжилгээний газар.