Украин улс Оросын эсрэг дайн эхлээд дөрвөн жил үргэлжилж буй энэ үед хүн амын бууралт, гадаад дүрвэлтийн хямралтай нүүр тулгарч байна. Ийм нөхцөлд тус улсын парламент шинээр хууль баталж, хоёр буюу түүнээс олон иргэншилтэй байхыг хуулиар зөвшөөрөх болсныг зарлалаа. Өмнө нь Украины хууль ёсоор зөвхөн ганц иргэншлийг зөвшөөрдөг байсан бөгөөд хэн нэгэн Украинд иргэн болохыг хүсвэл өөр улсын иргэншлээ заавал татгалзах шаардлагатай байв.

Одоогоор гадаадад амьдарч буй украин гаралтай хүмүүсийн тоо хорин таван саяд хүрч, энэ нь тус улсын дотоодын хүн ам болох гучин найман саятай дүйцэхүйц хэмжээнд хүрээд байна. Харин 1991 онд Зөвлөлт Холбоот Улс задрахад Украин улс тавин хоёр сая хүнтэй байжээ. Ийнхүү олон сая иргэн гадаад руу цагаачилсан нь нэг талаар эдийн засгийн бэрхшээл, нөгөө талаар Оросын түрэмгийллийн улмаас үүссэн дайнаас шалтгаалсан дүрвэлттэй холбоотой юм.

Шинэ хуулийн дагуу гадаадын улс оронд амьдарч буй Украин гаралтай иргэд дахин Украины иргэншил авах боломжтой болж байна. Энэ нь эх орноо орхиход хүрсэн ч буцаж очих хүсэлтэй, эсвэл эх оронтойгоо холбоотой байхыг эрмэлздэг олон мянган хүний хувьд эерэг алхам болж байна. Мөн гадаадад төрж өссөн, эсвэл гадаадын иргэнтэй гэр бүл болсон, давхар иргэншилтэй байх шаардлагатай болсон хүмүүст ч энэ хууль шууд хамаарна.

Мөн Украин талд сайн дураар тулалдаж буй гадаадын иргэдэд Украины иргэншлийг олгох нөхцөлийг хөнгөвчилж байгаа бөгөөд тэднээс Украин хэлийг эзэмшсэн, тус улсын түүх болон Үндсэн хуулийн талаарх мэдлэгтэй гэдгийг шалгах шаардлага тавигдаж байгаа аж.

Украины Засгийн газар энэхүү шинэчлэл нь дайнтай зэрэгцэн улам бүр хүндэрч буй хүн амын асуудлыг шийдвэрлэхэд гол үүрэг гүйцэтгэнэ гэж үзэж байна.

Эх сурвалж: BBC, Deutsche Welle, The Guardian