АНУ-ын Ерөнхийлөгч Дональд Трамп Хятадын ByteDance компанийн эзэмшилд байдаг TikTok олон нийтийн сүлжээг тус улсад бүрмөсөн хаах эцсийн хугацааг дахин 90 хоногоор сунгасан тухай Цагаан ордны хэвлэлийн төлөөлөгч Кэролайн Ливитт мэдэгдлээ.
Энэ шийдвэр нь Трампын зүгээс TikTok-ийн эсрэг гурав дахь удаагийн хойшлуулалт бөгөөд тус аппликейшнийг АНУ-д үргэлжлүүлэн ажиллуулах эсэх нь одоогоор тодорхойгүй хэвээр байна.
Эргэн сануулахад, 2024 оны дөрөвдүгээр сард тухайн үеийн ерөнхийлөгч Жо Байден TikTok-ийг АНУ-д үргэлжлүүлэн ажиллуулахыг хүсвэл энэ оны нэгдүгээр сарын 19-ний дотор АНУ-д үйл ажиллагаагаа явуулах эрхийг хятад эзэмшлээс салгаж зарах хуульд гарын үсэг зурсан байдаг. Хэрвээ энэ нөхцөлийг биелүүлээгүй бол АНУ-д TikTok-ийг бүрмөсөн хориглох байсан юм.
ByteDance тус хугацаанд ямар нэгэн худалдан авагчтай албан ёсны хэлэлцээр хийхээс өмнө нэгдүгээр сарын 18-нд АНУ дахь үйл ажиллагаагаа зогсоож буйгаа зарласан ч 19-ний орой TikTok дахин ажиллаж эхэлжээ. Үүний дараа Ерөнхийлөгчийн суудалд эргэн ирсэн Дональд Трамп энэ оны дөрөвдүгээр сарын 5 хүртэл, дараа нь дахин 75 хоногоор сунгаж, зургаадугаар сарын 18 хүртэл үргэлжлүүлэн ажиллах боломжийг олгосон байна.
TikTok-ийг АНУ-д худалдан авч, үйл ажиллагааг нь үргэлжлүүлэх боломжтой дараах нэр бүхий дөрвөн этгээд тодроод байна:
-
Илон Маск
-
Oracle компанийн үүсгэн байгуулагч Ларри Эллисон
-
видеоблогчин MrBeast (Жеймс Дональдсон)
-
Microsoft корпораци
Мөн нэгэн сонирхолтой санал болгосон этгээд нь Белорусийн иргэн Денис Ярацийн үүсгэн байгуулсан хиймэл оюун ухааны стартап болох Perplexity юм. Тус компани ByteDance-тэй нэгдэн ажиллахыг санал болгосон тухай мэдээлэл гарсан байна.
TikTok-ийн хувь заяа одоогоор бүрэн тодорхойгүй хэвээр байгаа ч АНУ-ын эрх баригчдын хувьд хэрэглэгчийн мэдээллийн аюулгүй байдал, гадны хяналттай байж болзошгүй байдал нь гол шалтгаан хэвээр байгааг онцолж байна.
Эх сурвалж: OfficeLife.media, White House Press.
