Индонезийн зүүн нутагт орших Левотоби Лаки-лаки галт уул дэлбэрсний улмаас Бали арал руу ирэх, буцах олон арван нислэгийг цуцалсан тухай theguardian.com мэдээллээ.
Мягмар гарагт орон нутгийн цагаар 17:35 цагийн үед дэлбэрэлт болж, галт уулын үнс нурам уулын оргилоос 10 мянган метрийн өндөрт цацагдсан байна. Энэ галт уул нь Бали арлаас зүүн зүгт, аялал жуулчлал өндөр хөгжсөн Флорес арал дээр оршдог.
Галт уул дэлбэрсэнтэй холбогдуулан Индонезийн эрх баригчид аюулын түгшүүрийг хамгийн дээд буюу дөрөвдүгээр түвшинд хүргэсэн ч хүний амь эрсэдсэн, байшин барилгууд эвдрэн сүйрсэн талаар одоогоор мэдээлэл ирээгүй байна.
Нислэгийн цуцлалтууд
Үнс нурам агаарт тархсаны улмаас хэд хэдэн агаарын тээврийн компани нислэгээ цуцалжээ:
- Virgin Australia компани Брисбен, Мельбурн хотуудаас Балиг чиглэсэн нислэгүүдээ цуцалсан.
- Jetstar компани Австралиас Балиг чиглэсэн өглөөний 4 нислэгээ цуцалсан.
- Qantas компани нөхцөл байдлыг анхааралтай ажиглаж байна.
- Балигийн олон улсын нисэх онгоцны буудлын цахим хуудсанд бичсэнээр, Энэтхэгийн Air India, Сингапурын TigerAir, Хятадын Juneyao Airlines, Малайзын AirAsia агаарын тээврийн компаниуд ч нислэгүүдээ зогсоосон байна.
Бали арал дахь олон улсын Нгурах-Рай нисэх онгоцны буудал ердийн хуваарийн дагуу үйл ажиллагаагаа үргэлжлүүлж байгаа ч галт уул дэлбэрснээс шалтгаалан зарим нислэгийг цуцалсан бөгөөд энэ нь нислэгийн чиглэл, агаарын тээврийн компаниудаас шалтгаална гэдгийг нэрээ хэлэхийг хүсээгүй нисэх буудлын ажилтан ярьжээ.
Левотоби Лаки-Лаки галт уул өнгөрсөн оны 11 дүгээр сард ч дэлбэрч байсан бөгөөд үүний улмаас хүмүүс амиа алдаж, олон мянган хүнийг нүүлгэн шилжүүлж, Балиг чиглэсэн олон улсын олон арван нислэгийг цуцалж байсан түүхтэй.
