Ирэх долоо хоногт Венец хотноо болох Амазон компанийг үүсгэн байгуулагч Жефф Безосын хурим нутгийн идэвхтнүүдийн эсэргүүцэлтэй тулгарч, цуврал ажиллагаа зохион байгуулахаар болжээ. Олон сая долларын өртгөөр хийгдэх энэхүү нижгэр ёслолын үеэр эртний гайхамшигт Венец хотын зарим хэсгийг бүрэн хаах гэж байгаа нь иргэдийн дургүйцлийг хүргэсэн байна.

Идэвхтнүүд Сан-Жоржо Мажоре сүмээс Риальто гүүр хүртэлх зайд Безосыг эсэргүүцэн түүний хэвлэмэл зургуудыг өлгөжээ. Мөн тэд хуримын ёслолыг тасалдуулахын тулд Венецийн сувгууд руу үсэрч орох, зочид хурим болох газарт очиход нь саад учруулахын тулд нарийхан гудамжуудыг хаахаар төлөвлөж байгаа аж.

Италийн хэвлэлүүдэд бичсэнээр, дээд зиндааны хэдэн зуун зочид, тэдний дотор Ким Кардашян, поп од Кэти Перри нар энэ сарын 23-28-ны өдрүүдэд Венецид хүрэлцэн ирнэ. Хуримын ёслол Ариун Маркийн талбайн эсрэг талын Сан-Жоржо аралд болох бөгөөд Венецийн бүх тансаг зочид буудлын өрөөнүүд болон усны таксинуудыг урьдчилан захиалсан байна.

Амазон компани болон сансрын технологийн Блю Орижн компанийг үүсгэн байгуулагч, өдгөө 61 настай Жефф Безос дэлхийн хамгийн баян хүмүүсийн жагсаалтын гуравдугаарт бичигддэг бөгөөд 220.9 тэрбум долларын хөрөнгөтэй ажээ. Тэрбээр олон жилийн турш хамт амьдарсан сүйт бүсгүй Лоран Санчестай хуримлах гэж байгаа юм.