ОХУ-ын Ерөнхийлөгч Владимир Путин Украины удирдагч Владимир Зеленскийтэй уулзахад бэлэн байгаагаа илэрхийлсэн хэдий ч, хэлэлцээрийн "баримт бичигт хэн гарын үсэг зурах" нь одоогоор ойлгомжгүй байна гэж мэдэгджээ. Тэрбээр энэ тухайгаа олон улсын мэдээллийн агентлагуудын удирдлагуудтай уулзах үеэрээ хэлэв.

Путин хэлэхдээ: "Ташрамд хэлэхэд би бүх хүнтэй, тэр дундаа Зеленскийтэй уулзахад бэлэн байна. Хэрэв Украины төр хэн нэгэнд хэлэлцээ хийх эрх олгож байгаа бол тэр нь Зеленский байх болтугай. Гэхдээ асуудал үүнд биш, харин баримт бичигт хэн гарын үсэг зурах вэ гэдэгт оршиж байна."

Тэрбээр цааш нь Украины одоогийн эрх баригчдын хууль ёсны байдлын талаар байр сууриа илэрхийлж, "ноцтой асуудлуудыг шийдэхэд бидэнд суртал ухуулгын биш, харин онолын үндэслэл чухал" гэв. Путин Украины Үндсэн хуульд зааснаар тус улсын ерөнхийлөгчийг таван жилийн хугацаатай сонгодог бөгөөд дайны байдлын үед бүрэн эрхийг нь сунгах ямар ч механизм байхгүй гэдгийг дурджээ.

ОХУ-ын Ерөнхийлөгч мөн хэрэв тухайн улсын төрийн тэргүүн нь хууль ёсны бус байвал түүний томилсон засаглалын бүх бүтэц мөн адил хууль ёсны бус болно гэж нэмж хэлсэн байна.

Путин хэлэлцээ хийхээс татгалзахгүй гэдгээ дахин онцолсон ч, үүний тулд "их зүйлийг хийх шаардлагатай байна" гэж мэдэгдэв.

Эх сурвалж: TASS