Францын нийслэл Парис хотын ойролцоох Бурже хотод зохион байгуулагдаж буй олон улсын агаар-сансрын техникийн 55 дахь удаагийн үзэсгэлэн нь дэлхийн батлан хамгаалах салбарын хамгийн сүүлийн үеийн ололтуудыг харуулах томоохон арга хэмжээ болж байна. Энэхүү нэр хүндтэй үзэсгэлэнд БНХАУ холын тусгалтай “PL-15E” залуурт пуужингаар зэвсэглэсэн "J-10CE" байлдааны нисэх онгоцны загварыг танилцуулж, олон улсын анхаарлыг татав.

Хятадын нисэх онгоцны үйлдвэрлэлийн тэргүүлэгч “AVIC” корпорацын гол үзүүлэн болсон "J-10CE" нь Хятадын батлан хамгаалах технологийн хурдацтай хөгжлийг илтгэж байна. Тус нисэх онгоцны танилцуулга нь дэлхийн батлан хамгаалах салбарт Хятадын нөлөө нэмэгдэж буй үед онцгой ач холбогдолтой юм.

Түүнчлэн, энэхүү сөнөөгч онгоцны хажууд радарт үл үзэгдэх чадвартай, хамгийн сүүлийн үеийн J-35A онгоцны загварыг байршуулсан нь үзэсгэлэнгийн үеэр онцгой содон байлаа. J-35A загварыг өнгөрсөн намар олон нийтэд анх удаа танилцуулсан бол энэ удаад хилийн чанадад буюу олон улсын индэрт анх удаа дэлгэн үзүүлж буйгаараа онцлог юм.

"J-10CE" нь Хятадын армийн зэвсэглэлд ашиглагдаж буй сөнөөгч онгоцны экспортод зориулсан хувилбар бөгөөд олон улсын зах зээлд өрсөлдөх чадварыг харуулж байна. Энэхүү онгоцыг техникийн бааз суурь, дэд бүтцийн хувьд харилцан адилгүй улс орнуудын хэрэгцээнд нийцүүлэн тусгайлан зохион бүтээсэн байна. Мөн уур амьсгалын өөр өөр бүсүүдэд ашиглахад бүрэн тохируулсан бөгөөд орчин үеийн электрон төхөөрөмж, өндөр хүчин чадалтай илрүүлэх системээр бүрэн тоноглосон нь түүний байлдааны чадварыг нэмэгдүүлжээ.

Үзэсгэлэнд танилцуулж буй загвар нь агаарын байг маш хол зайнаас устгадаг шинэ төрлийн пуужингаар тоноглогдсон нь анхаарал татаж байна. Эдгээр дэвшилтэт зэвсэг нь байг аюултай бүсэд нэвтрэхээс нь өмнө устгах боломжийг олгосноор нисгэгчдийн аюулгүй байдлыг хангаж, байлдааны давуу байдлыг эрс нэмэгдүүлэх ач холбогдолтой юм.