Бээжин хотод зохион байгуулагдсан Yongle дуудлага худалдааны үеэр Лабубу тоглоомын нэгэн онцгой бөгөөд цорын ганц хувь нь дээд үнэ хүргэн зарагджээ. Дэлхийд хосгүй гэгдэх, ногоон өнгийн, 131 сантиметр өндөртэй, өвөрмөц арзгар шүдтэй энэхүү Лабубу тоглоом 1.08 сая юаниар буюу ойролцоогоор 150 мянган ам.доллараар борлуулагдсан байна. Энэхүү үйл явдал нь цуглуулгын тоглоомын зах зээлд томохон шуугиан тарьж, тус салбарын үнэ цэнийг дахин баталлаа.
Энэхүү борлуулалт нь "blind box" буюу сохор хайрцагны хэмжээний тоглоомын түүхэнд хамгийн өндөр үнэтэй лот болж тэмдэглэгджээ. Ийм төрлийн тоглоомууд нь ихэвчлэн жижиг хэмжээтэй байдаг ч, урлагийн болон ховордолын үнэ цэнээрээ ийнхүү өндөр үнээр зарагдах нь харьцангуй ховор юм. Үүнээс гадна, "Гурван мэргэн Лабубу" хэмээх нэрээр алдаршсан ховор цуглуулгын үнэ 510 мянган юаньд хүрсэн нь мөн онцгой үзэгдэл байлаа. Уг цуглуулгыг 2017 онд ердөө 120 ширхэгээр л үйлдвэрлэж байсан нь түүний ховордлыг харуулж, цуглуулагчдын сонирхлыг татсан гол шалтгаан болжээ.
Өнгөрсөн долоо хоногт явагдсан уг дуудлага худалдаа нь алдарт Pop Mart үйлдвэрийн бүтээгдэхүүнүүдэд зориулагдсан байсан бөгөөд ийм төрлийн арга хэмжээний анхных нь болж түүхэнд бичигдлээ. Дуудлага худалдаанд 200 орчим хүн биечлэн оролцсон бол мянга гаруй онлайн дуудлага явагдсан нь цуглуулгын тоглоомын зах зээлийн өсөн нэмэгдэж буй сонирхол, идэвхтэй оролцоог тодорхой харуулж байна. Тус арилжаанд нийт 48 лот тавигдаж, тэдгээрийн нийт үнэлгээ 3.7 сая юаньд хүрсэн нь тус дуудлага худалдаа маш амжилттай болсныг нотолж байна. Энэхүү амжилттай дуудлага худалдаа нь цуглуулгын тоглоомууд урлагийн бүтээлүүдтэй адил өндөр үнэ цэнэтэй болж, хөрөнгө оруулалтын нэг хэлбэр болж байгааг харуулж байна.
Лабубу тоглоомоор алдартай Pop Mart компанийг үндэслэгч Ван Нин энэхүү тоглоомтой холбоотой ихээхэн хөөрөлтийн ачаар Хятадын хамгийн баян 10 хүний тоонд багтсан тухай Forbes сэтгүүл мэдээлэв. Forbes сэтгүүлийн гаргасан Хятадын баячуудын жагсаалтад 38 настай Ван Нин анх удаагаа багтаж, түүний хөрөнгийг 22.7 тэрбум ам.доллараар үнэлжээ. Тэрбээр ByteDance компанийг үндэслэгч Жан Имин, Tencent компанийг үндэслэгчдийн нэг Ма Хуатэн нарыг багтаасан энэ жагсаалтын хамгийн залуу тэрбумтан болсон нь онцгой анхаарал татаж байна.
Энэ жилийн эхний улирлын дүнгээр Pop Mart-ын худалдаа 170%-иар өсч, компанийн хувьцааны үнэ 270 Гонконг доллар буюу 34.40 ам.доллар хүртэл нэмэгджээ. АНУ, Европт ихээхэн эрэлттэй байгаа Лабубу тоглоомын зүүлтийн хувьцааны үнийг Deutsche Bank 52%-иар үнэлэн, 303 Гонконг доллар буюу 38.6 ам.доллар хүртэл өсгөжээ. Ван Нин Бээжингийн Pop Mart компаниа 2010 онд үүсгэн байгуулсан бөгөөд эхэндээ олон брэндийн жижиглэн худалдаа эрхэлдэг байсан юм. Одоо компанийн зах зээлийн хөрөнгөжилт 365 тэрбум Гонконг доллар буюу 46.5 тэрбум ам.долларт хүрч, хүүхдийн тоглоомын салбарт тэргүүлэгчдийн нэг болоод байна.
Эх сурвалж: officelife.media болон officelife.media
