Сэлэнгэ аймгийн Баруунбүрэн сумын нутагт орших түүхэн, шашны үнэт өв болох Амарбаясгалант хийд орчимд агаарын болон хөрсний бохирдлыг бууруулах зорилгоор байгаль орчинд ээлтэй технологийн шийдэл бүхий хог шатаах зуухыг суурилуулжээ. Уг ажилд нийт 33 сая төгрөгийн хөрөнгө зарцуулсан байна.
Байршсан зуух нь нэг удаад 4 тонн хогийг 1 цагийн дотор бүрэн шатаах хүчин чадалтай бөгөөд өдөрт 12 цаг тасралтгүй ажиллах боломжтой. Технологийн хувьд шаталтын явцад үүсэх утаа, угаарын хийг 99 хувь хүртэл шатаан саармагжуулдаг тул орчны агаарын бохирдлыг мэдэгдэхүйц бууруулах чадвартай гэж мэргэжилтнүүд онцолжээ.
Зуух нь ахуйн болон хүнсний хог хаягдлыг шатаах зориулалттай бөгөөд бүрэн шаталтын үр дүнд маш бага хэмжээний үнс ялгардаг байна. Тухайлбал, 4 тонн хогноос ердөө 80 килограмм орчим үнс гардаг нь хог хаягдлыг байгальд ээлтэй, үр ашигтай аргаар боловсруулах боломжийг бүрдүүлж байна.
Эх сурвалж: Сэлэнгэ аймгийн ЗДТГ
