Казахстаны нийслэл Астана хотноо өнөөдөр Төв Ази-Хятадын хоёр дахь дээд хэмжээний уулзалт эхэлсэн талаар Казинформ агентлаг мэдээллээ. Уг уулзалтад Төв Азийн таван орны төрийн тэргүүнүүд болон БНХАУ-ын дарга Ши Жиньпин оролцож байна. Уулзалтын хүрээнд бүс нутгийн хамтын ажиллагааг шинэ шатанд гаргах, улс төр, эдийн засаг, аюулгүй байдал, соёл, хүмүүнлэгийн салбарын хамтын ажиллагааг бэхжүүлэх зорилтууд тавигдаж байгаа юм.

Тухайлбал, худалдаа, тээвэр, дамжин өнгөрөх тээврийн сүлжээний уялдаа холбоог сайжруулах, эрчим хүч болон инновацийн салбарт хамтын ажиллагаа өргөжүүлэх нь энэ удаагийн уулзалтын гол сэдвүүдийн нэг юм. Мөн бүс нутгийн аюулгүй байдал, терроризм зэрэг үндэстэн дамнасан аюул заналхийллийн эсрэг хамтран ажиллах, соёл, боловсрол, хүмүүнлэгийн харилцааг гүнзгийрүүлэх талаар хэлэлцэнэ.

Уулзалтын үр дүнд “Астанагийн тунхаглал”, “Мөнхийн найрамдал, сайн хөрш, хамтын ажиллагааны гэрээ”-нд гарын үсэг зурахаар төлөвлөжээ. Анхны уулзалт өнгөрсөн 2023 оны тавдугаар сард БНХАУ-ын Сиань хотноо болсон юм.

Ерөнхийлөгч Касым-Жомарт Токаев БНХАУ-ын дарга Ши Жиньпинийг албан ёсоор хүлээн авч уулзахдаа цаашдын хамтын ажиллагааны үндсэн чиглэлүүдийг танилцуулж, хэд хэдэн шинэлэг санаачилга дэвшүүлжээ. Хоёр орны удирдагчдын хэлэлцээний хүрээнд Засгийн газар хоорондын болон яам хоорондын нийт 24 баримт бичигт гарын үсэг зурсан байна.

Түүнчлэн, Хятад-Төв Азийн бизнесийн зөвлөлийн хоёрдугаар хурлын үеэр ногоон эрчим хүч, ложистик, худалдаа, шинэ дэд бүтцийн төвүүд байгуулах чиглэлээр нийт 17 тэрбум ам.долларын өртөг бүхий 35 гаруй санамж бичиг байгуулж буйг Казахстаны Худалдааны танхимын тэргүүн Мурат Каримсаков онцолсон байна.

Эх сурвалж: Kazinform