Канад улсад зохион байгуулагдаж буй “Долоогийн бүлэг” (G7)-ийн дээд хэмжээний уулзалтын үеэр Японы Ерөнхий сайд Шигэрү Ишиба АНУ-ын Ерөнхийлөгч Дональд Трамптай уулзсан ч татварын асуудлаар тодорхой тохиролцоонд хүрч чадаагүй талаар Японы тал мэдээллээ.
Ерөнхий сайд Ишиба хэвлэлийн бага хурал дээр хэлэхдээ, “Бид Японы үндэсний ашиг сонирхолд нийцсэн татварын зохицуулалтыг бий болгох боломжийг судалж байна. Ерөнхийлөгч Трамптай илэн далангүй ярилцсан бөгөөд хэлэлцээг цаашид үргэлжлүүлэхийг холбогдох сайд нарт үүрэг болголоо” гэж мэдэгдэв.
Тэрбээр хэлэлцээний явцад зарим санал зөрөлдөөн хэвээр байгааг дурдсан бөгөөд худалдааны хэлэлцээгээр бүх асуудлыг бүрэн тохиролцож чадаагүйг онцолсон байна.
АНУ-ын Ерөнхийлөгч Дональд Трамп энэ оны дөрөвдүгээр сарын 2-нд гадаадын бараанд 10 хувийн импортын татвар ногдуулж эхэлсэн нь олон улсын түншүүдтэй сөргөлдөөн үүсгэх шалтгаан болсон юм. Улмаар дөрөвдүгээр сарын 9-нд тэрбээр зарим оронд ногдуулах татварын хэрэгжих хугацааг 90 хоногоор хойшлуулсан билээ.
Япон улс татварын асуудлыг дахин нягтлахыг АНУ-д удаа дараа уриалж, хоёр орны худалдааны яриа хэлэлцээг албан ёсоор эхлүүлээд байгаа юм. Японы талын төлөөлөгчөөр тус улсын Эдийн засгийн сэргэлтийн сайд Рёсэй Аказава оролцож байна.
Хоёр орны хооронд үргэлжилж буй татварын асуудал нь бүс нутгийн эдийн засгийн тогтвортой байдалд чухал нөлөөтэй гэж ажиглагчид үзэж байгаа бөгөөд ойрын хугацаанд нэмэлт уулзалт, хэлэлцээ хийх төлөвтэй байна.
Эх сурвалж: TASS.
