Украин, Оросын талууд амь үрэгдсэн цэргүүдийн цогцсыг харилцан шилжүүлэх ажиллагааг сүүлийн өдрүүдэд идэвхтэй явуулж, даваа гарагт эцэслэсэн талаар хоёр талаас мэдээллээ. Украин талын мэдээлснээр, Оросын тал сүүлийн ээлжид 1245 хүний цогцсыг хүлээлгэн өгсөнөөр нийт 6057 хүний цогцсыг шилжүүлж дуусгасан байна. Харин Оросын албаныхан Украин нийт 6060 цогцос шилжүүлсэн хэмээн мэдэгджээ.

Одоо эдгээр цогцоснуудын дунд Украин цэргүүдийн цогцос байгаа эсэхийг тодруулах шинжилгээ, таних ажиллагаа үргэлжилж байна. Украин Улсын Дотоод хэргийн сайд Игорь Клыменко энэ ажиллагааны явцад хүндрэл үүсэж байгааг мэдэгдэж, Оросын тал цогцсыг зориудаар эрэмдэглэсэн, зарим тохиолдолд нэг хүний цогцосны хэсгүүдийг өөр өөр уутанд хийж өгсөн гэж буруутгасан байна.

Хамгийн сүүлчийн солилцоог Улаан загалмайн нийгэмлэгийн хяналтан дор даваа гарагт хэрэгжүүлсэн. Энэ ажиллагаа нь сүүлийн өдрүүдэд Туркийн Истанбул хотноо болсон хоёр улсын энхийн хэлэлцээний хүрээнд олзлогдогсдыг солилцох болон амь үрэгдэгсдийн цогцсыг эх оронд нь буцаах тохиролцооны үр дүн байсан юм.

Хоёр талын солилцсон цогцсын тоо харьцангуй зөрүүтэй байгаа нь Орос улс сүүлийн үед зарим газар нутгийг хяналтдаа оруулсантай холбоотой байж болзошгүй гэж ажиглагчид үзэж байна. Оросын талаас амь үрэгдсэн цэргүүдээ эрт олж авах боломж өндөр байсан бол Украин талын хувьд цогцсыг дайсны хяналтад байгаа бүсээс эргэн авах нь илүү хүндрэлтэй байжээ.

Эх сурвалж: BBC, Reuters, Al Jazeera.