Энэтхэгийн баруун нутгийн Ахмедабад хотоос хөөрснийхөө дараахан осолдсон “Air India” компанийн Boeing 787-8 Dreamliner загварын онгоцны бүхээгийн дуу хураагчийг мөрдөн шалгагчид олжээ. Ослын шалтгааныг тодруулахад онцгой ач холбогдолтой энэхүү төхөөрөмж нь нисгэгчдийн яриа, дохиолол, орчны дуу чимээ зэрэг мэдээллийг агуулдаг бөгөөд өмнө нь олдсон нислэгийн мэдээлэл бүртгэгчтэй хамт “хар хайрцаг”-ийг бүрдүүлдэг.
Онгоц өнгөрсөн пүрэв гарагт Лондонг чиглэн хөөрсөн ч хөөрснөөсөө хойш нэг минут хүрэхгүй хугацаанд осолдсон бөгөөд нисэх онгоц Ахмедабадын Анагаах ухааны коллежийн байр руу мөргөсөн байна. Энэхүү ослын улмаас 242 зорчигч, хөлгийн багийн гишүүдийг оролцуулан нийт 270 хүн амиа алджээ. Одоогоор ганцхан хүн амьд үлдсэн болохыг албаныхан баталсан байна.
Ослын мөрдөн шалгах ажиллагааг Энэтхэгийн Нисэх онгоцны ослыг мөрдөн шалгах товчоо удирдан явуулж байгаа бөгөөд АНУ, Их Британиас мэргэжилтнүүд ирж дэмжлэг үзүүлж байна. Тус хороо гурван сарын дотор урьдчилсан дүгнэлтээ гаргах бөгөөд дахин ийм төрлийн осол гаргуулахгүйн тулд шинэ журам, стандарт санал болгоно гэж “All India” радио мэдээлжээ.
Ослын газарт ажиллаж буй багууд амралтын өдрүүдэд 270 хүний цогцсыг гаргаж авсан талаар эмнэлгийн байгууллагууд мэдээлсэн. Одоогоор ослоос болж барилга дотор байсан хүмүүсийн амь насыг ч хохироосон эсэхийг тогтоохоор ажиллаж байгаа бөгөөд тоон үзүүлэлтийг албан ёсоор зарлаагүй байна.
Энэхүү осол нь “Air India” компанийн сүүлийн жилүүдэд тохиолдсон хамгийн олон хүний амийг авч одсон ноцтой осол болоод байна. Хар хайрцгийн өгөгдлүүдийг нарийвчлан задлан шинжлэх явц эхэлж байгаа бөгөөд олон улсын мэргэжилтнүүдийн хамтын ажиллагаагаар ослын цаад шалтгаан тун удахгүй тодорхой болох төлөвтэй байна.
Эх сурвалж: BBC
