АНУ-ын Ерөнхийлөгч Дональд Трамп Гренландыг нутаг дэвсгэрийнхээ нэг хэсэг болгох сонирхлоо хэдэнтээ илэрхийлсэн энэ үед Францын Ерөнхийлөгч Эммануэл Макрон Арктикийн бүс нутагт байр сууриа бэхжүүлэх алхам болгон Гренландад Ерөнхий консулын газар байгуулахаар төлөвлөж буйгаа зарлалаа.
Э.Макрон энэ талаарх мэдэгдлээ Данийн Ерөнхий сайд Метте Фредериксен болон Гренландын Ерөнхий сайд Йенс-Фредерик Нильсен нартай уулзсаны дараа хийсэн хэвлэлийн бага хурлын үеэр илэрхийлсэн байна. “Бид та бүхний хажууд, ойр байхын тулд Гренландад Ерөнхий консулын газар байгуулахаар шийдвэрлэсэн” хэмээн тэр мэдэгджээ.
Францын төрийн тэргүүн Ням гарагт Арктикийн бүсийн аюулгүй байдал, геополитикийн нөхцөл байдлын талаар хэлэлцэх зорилгоор Гренландад айлчилсан бөгөөд энэ нь бүс нутгийн улс төр, аюулгүй байдлын асуудалд Франц илүү шууд оролцох болсны илрэл болж байна.
Түүнчлэн тэрээр саяхан Ницца хотод болсон Далайн асуудлаарх НҮБ-ын гуравдугаар бага хуралд оролцохдоо Гренландыг АНУ-ын мэдэлд авах оролдлогыг эрс эсэргүүцэж буйгаа илэрхийлсэн юм. Тэрээр мөн далайн гүний байгалийн нөөцийг эдийн засгийн ашиг сонирхлын үүднээс ашиглахыг хүчтэй эсэргүүцэж буйгаа мэдэгдсэн байна.
Францын энэ алхам нь Арктикийн бүс нутаг дахь геополитикийн өрсөлдөөн ширүүсэж буйг илтгэж байгаа бөгөөд Гренланд нь стратегийн байрлалтай, байгалийн баялгаар арвин чухал бүс нутгийн нэг хэмээн олон улс харж байна.
Эх сурвалж: TASS
