АНУ-ын Ерөнхийлөгч Дональд Трамп өнгөрсөн пүрэв гарагт Цагаан ордонд болсон арга хэмжээний үеэр авто машины импортод ногдуулж буй гаалийн татварыг ойрын хугацаанд нэмэгдүүлж болзошгүй талаар мэдэгдлээ. Түүний үзэж буйгаар, татвар нэмэгдүүлэх нь авто машин үйлдвэрлэгчдийг АНУ-д илүү их хөрөнгө оруулах, үйлдвэрүүдээ дотоодод байгуулахад түлхэц өгнө гэж үзэж буй аж.

Тэрбээр үгэндээ “Татвар өндөр байх тусам, тэд үйлдвэрээ Америкт барих магадлал ихсэх болно. Бид татвар тогтоогоогүй бол тэд нэг ч центийн хөрөнгө оруулалт хийхгүй байсан” хэмээн онцлон дурдав. Үүний зэрэгцээ тэрээр “General Motors” компани гуравдугаар улиралд АНУ дахь гурван үйлдвэртээ 4 тэрбум ам.долларын хөрөнгө оруулалт хийхээр, мөн “Hyundai” компани Америкт гангийн үйлдвэр барих төлөвлөгөө багтсан 21 тэрбум долларын хөрөнгө оруулалт хийхээр төлөвлөж буйг эш татан дурдсан байна.

Гэвч авто машины салбарын үйлдвэрлэгчид энэ алхмыг шүүмжилж буй. Тэд 25 хувийн гаалийн татварыг бууруулахыг удаа дараа Цагаан ордноос хүсч байгаа бол, Детройтын автомашины “гурвал” буюу Ford, General Motors, Stellantis зэрэг компаниудын зүгээс Их Британиас авто машин импортлоход ногдуулах татварыг бууруулж, харин Канад, Мексикийнхийг хэвээр үлдээж буйг шүүмжилжээ.

Тарифаас үүдэн үнийн дарамтад орж буй авто үйлдвэрлэгчид дунд “Ford Motor”, “Subaru” компаниуд автомашиныхаа зарим загварын үнийг нэмжээ. “Ford” тавдугаар сард мэдэгдэхдээ, тарифын нэмэгдэл нь компанийн нийт орлогод 1.5 тэрбум ам.долларын сөрөг нөлөө үзүүлэхээр байгааг онцолж байв.

Эх сурвалж: Reuters