Израил улс өнөө өглөөнөөс эхлэн Иран дахь цөмийн байгууламжууд, баллистик пуужингийн үйлдвэрүүд, цэргийн удирдлагын байруудыг чиглэсэн агаарын цохилт өгөх ажиллагаа эхлүүлсэн нь олон улсын анхаарлыг татаад байна. Тус ажиллагаа нь Тегераныг цөмийн зэвсэг бүтээхээс урьдчилан сэргийлэх зорилготой урт хугацааны төлөвлөгөөний нэг хэсэг байж магадгүйг Израилын албаныхан мэдэгдэв.

Ираны уран баяжуулах гол төвүүдийн нэг болох Натанзын байгууламж болон нийслэл Тегераны зарим дүүрэгт хүчтэй дэлбэрэлт болсон тухай Ираны хэвлэлүүд болон газар дээрх гэрчүүд мэдээлжээ. Израилын талаас болзошгүй хариу цохилт, дрон болон пуужингийн дайралтуудыг таслан зогсоох зорилгоор улс даяар онц байдал зарласан байна.

Ираны төрийн телевиз мэдээлснээр, тус улсын хувьсгалт гвардийн командлагч Хоссейн Салами, мөн цэргийн төв байр, энгийн иргэд амьдардаг орон сууцны хорооллууд халдлагад өртөж, хэд хэдэн хүүхэд амиа алдсан байна. Израилын Ерөнхий сайд Бенжамин Нетаньяху мэдэгдэлдээ “Энэхүү ажиллагаа бол Ираны зүгээс манай аюулгүй байдалд учруулсаар ирсэн аюулд цэг тавих алхам юм. Бид зорилгоо биелүүлэх хүртэл тасралтгүй үргэлжлүүлнэ” хэмээв.

Энэхүү цэргийн ажиллагаа хэдэн өдөр үргэлжилж магадгүй бөгөөд Израилын талаас уран баяжуулах, баллистик пуужин бүтээх ажилд оролцож байгаа Ираны эрдэмтдийг гол бай болгон цохилт өгч байгааг мөн дурдсан байна. Ираны парламентын Үндэсний аюулгүй байдал, гадаад бодлогын байнгын хорооны дарга Эбрахим Азизи “Израилын явуулсан довтолгоог бид хүлээн зөвшөөрч байгаа. Гэсэн ч Иран улс хариу арга хэмжээ авах болно. Иргэдээ тайван байхыг уриалж байна” гэж мэдэгджээ.

Иран улсад 15 хоногийн дотор цөмийн бөмбөг бүтээхэд шаардлагатай хэмжээний материал хуримтлагдсан талаар өмнө нь Израилын тагнуулын байгууллага мэдээлж байсан.

АНУ-ын Төрийн нарийн бичгийн дарга Марко Рубио “Израил улс энэ ажиллагааг дангаараа явуулж байгаа. АНУ оролцоогүй. Бид зөвхөн бүс нутаг дахь Америкийн иргэд болон цэргийн албаныхнаа хамгаалахад төвлөрч байна” хэмээн мэдэгдсэн байна. Ерөнхийлөгч Дональд Трамп пүрэв гарагт хийсэн мэдэгдэлдээ Израилын зүгээс Иранд цохилт өгөх магадлалтайг хүлээн зөвшөөрсөн ч, “асуудлыг энхийн замаар шийдэх хүсэлтэй байна” гэдгээ онцолжээ.

АНУ зэрэг орнууд Иран болон бүс нутгийн улс орнуудаас өөрсдийн иргэд, дипломат ажилтнуудаа татах мэдэгдлийг аль хэдийн гаргасан байна.

Эх сурвалж: Reuters, The Times of Israel, Shahrak News, CNN