Израилын Агаарын цэргийн хүчин баасан гаргийн шөнө Ираны нутаг дэвсгэрт “өрссөн цохилт” өгсөн тухай тус улсын Батлан хамгаалахын сайд Исраэль Кац мэдэгдлээ. Энэ талаар “Reuters” болон “The Times of Israel” мэдээлж, бүс нутагт онц байдал зарлагдсан болохыг нотолсон байна.
Израилын талын мэдээлснээр, Иран улс цөмийн бөмбөг үйлдвэрлэхэд шаардлагатай хэмжээний баяжуулсан ураны нөөцтэй болсон нь шууд аюул гэж үзэн тусгай ажиллагаа эхлүүлсэн бөгөөд Ираны цөмийн хөтөлбөрийг саатуулахын тулд цохилт өгөхөөс өөр аргагүйд хүрсэн гэж Израилийн арми мэдэгджээ.
Тэгвэл Ираны нийслэл Техран хотын зарим дүүрэгт хүчтэй дэлбэрэлтүүд сонсогдсон тухай тус улсын төрийн телевиз мэдээлж, агаарын довтолгооноос хамгаалах системийг байлдааны бүрэн бэлэн байдалд оруулсан байна. Мөн Имам Хомейнигийн нэрэмжит олон улсын нисэх буудлын нислэгүүдийг зогсоожээ.
Израил улс мөн агаарын орон зайгаа хаасан бөгөөд энэ нь бүс нутгийн цэргийн хариу арга хэмжээ авах эрсдэлийг улам өндөр болгож байгаа юм. Израилийн Батлан хамгаалахын сайд Исраэль Кац “Иран Израил руу удахгүй пуужин болон нисгэгчгүй онгоцоор довтлох төлөвтэй” гэж мэдэгдсэн нь нөхцөл байдлын хурцадмал шинжийг улам тод харуулж байна.
Цөмийн мөргөлдөөнд хүргэж болзошгүй энэхүү байдал олон улсын түвшинд онц анхаарал татаж, бүс нутгийн тогтвортой байдалд ноцтой аюул учруулж болзошгүй байна.
Эх сурвалж: DW.com, Reuters.com, The Times of Israel
