Энэтхэгийн “Air India” компанийн Лондон хотын чиглэлд хөөрсөн зорчигч тээврийн онгоц пүрэв гарагт Ахмедабад хотоос хөөрснөөс хойш удалгүй орон сууцны хороололд осолдож, онгоцонд байсан 242 зорчигчийн 241 нь амиа алдсан хүнд осол боллоо. Энэ бол тус компанийн түүхэнд тохиолдсон хамгийн ноцтой ослуудын нэг бөгөөд олон улсын анхаарлыг татаж байна.
Ослоос амьд үлдсэн цорын ганц хүн болох Британийн иргэн Вишвашкумар Рамеш эмнэлэгт хүргэгдэн эмчлүүлж буй бөгөөд түүнийг Энэтхэгийн Дотоод хэргийн сайд Амит Шах биечлэн эргэн очиж уулзсан байна. BBC телевизийн мэдээлснээр В.Рамеш Их Британийн Лестер хотод оршин суудаг бөгөөд гэр бүлийнхэнтэйгээ утсаар холбогдон өөрийгөө сайн байгаа тухай мэдээлжээ.
Тэрээр онгоц хөөрснөөс хойш 30 секундийн дараа хүчтэй чимээ гарсан бөгөөд бүх зүйл маш хурдан өрнөсөн гэж сэтгүүлчдэд мэдэгдсэн байна. В.Рамеш нь эхнэр, хүүхэдтэй бөгөөд Энэтхэгт төрсөн ч олон жил Их Британид амьдарч байжээ.
Ослын үеэр онгоцонд Энэтхэгийн 169, Британийн 53, Португалын долоо, Канадын нэг иргэн зорчиж явсан бөгөөд одоогоор ослын шалтгаан, онгоцны техникийн байдал, нисэх багийн мэдээлэл зэргийг мэргэжлийн байгууллагууд шалгаж эхэлжээ. Үндэсний болон олон улсын хэмжээнд онц байдал зарлаж, тусламж, дэмжлэг үзүүлэх ажиллагаа эрчимтэй өрнөж байна.
Эх сурвалж: BBC.com
